انت عارفه كل شئ 27/9/2014
يا حبيبتى.. وحب حبى..
عارفه اكتر شئ ضايقنى
لما شفت الخوف ف عينك.. من جبان
لما شفت الدمع سايل فوق خدودك.. م الهوان
لما شفت الحزن نايم بين جفونك.. وف أمان..
لما شفت البرد حاضنك..
وانت بين الحر تايهه.. ناسية نفسك..
كل دا خلانى أكره ...حتى سيرتك..
وانت عارفه....سر كرهك.....!!
*****
عارفه ليه..؟؟
لما شلتى بين ضلوعك .. قلب كارهك
وال حبك ..
وال ضحى بعمره كله .. لجل خاطرك..
تدبحيه..
واما يصرخ من قساوتك ..
تحرقيه..
لما فيك الحُر يصبح فى السجون
و ال سجنه ..الذليل
يبقى سوطه..
يبقى ظالمه بدون دليل
يبقى عتمة ضلمة فى الليل الطويل..
هو دا كان رد قلبك؟؟
هو دا رد الجميل..؟؟
هو مش مستنى منك اى رد..
ال حبك ... حب نفسه حب جد..
وال كارهك ... كُرهه باين ..مالو حد ..
انت بالنسباله فرصة..
إنت ند..
*****
لما فيك الحلم يصبح للصغار..
والجهالة ..
والوضاعة..
والندالة .. للكبار
لما شفت الدين.. شعار...
رمز للارهاب وفتنة ... وانكسار
لما شفت الفقر بين الناس... مسار
والتخلف.. ازدهار..
*****
سر كرهك .. هو ضعفك..
أصل ضعفك .. سر سرك..
بصى فوق...
تلقى نفسك تحت رجلك..
علّى صوتك..
اصل صوتك مش بيوصل غير لودنك..
حسى مرة...
خلّى روح الحس تسرى .. جوا جسمك
هو مات القلب فيك .. حتى نبضك ..؟؟
*****
فاردة حضنك للجميع..
المنافق والمسالم والمخادع .. والوديع
فاتحة بابك للوضيع ..
عارضه نفسك كالبضاعة ..
والخسارة .. ان سوقك ... بس بيع..
*****
خايفة ليه ... مش كفاية ماتخافيش...
مش كفاية الرعب ياخدك .. ماتناميش
أو بدال الدمع دم ما ينتهيش
او بدال الحزن هم ما يتمحيش..
او بدال البرد جمر ما ينطفيش
مش كفاية ال انت فيه...
عارفه ليه......؟؟
*****
مش هقول لك ..ما انتى عارفه كل حاجة..
انت شاهدة بكل شئ ..
انت شايفة بس ساكته ..
شايفة نار الغدر فيك .. بس هاديه
شايفك إيد إبليس بيلعب جوا قلبك.. عامله ناسيه
شايفة جهلك..شيفة جبنك..
بس نايمه
شايفة فقر بيملى بطنك
شايفة ظلم بيملى أرضك..
بس راضية ...
*****
أيه هقولك ..
شايفة دم وجرح نازف ...جوا نفسك
شايفة غدر وشايفة قهر وشايفك قبرك ..
بس كاتمة وحابسة سرك..
يبقى بس الخوف لوحدة مش كفاية
يبقى بس الحزن وحدة .. مش نهاية
يبقى بس الجهل راسم نفسه فيك
دى بداية ..
وال جاى ... وبكرة أكبر من حكاية ..
وانت راضية بكل حاجة
راضية ان الذل يحكم .. للنهاية
راضية ان الشر فيك .. يبقى حلم..
ويبقى علم .. ويبقى غاية..
*****
يبقى ليه اعتب عليك ِ
يبقى تصعب ليه دموعك .. بين عنيكِ
بعد قلبى .. وكل عمرى .. وكل حبى..
هان عليكِ
ليه أقولك عل بيك..
بس أقولك.. الف الف عيب عليكى
*****
جمال نصير
سبتمبر 2014
