'
مسآكم & صبآحكم ..شعر ؛
بعض قصآئد جميل الحرف : جمآل الشمري'
/
قطفت من السهر وجهٍ حزين
لقيت إني بلا وجهي و طحت
كأني في البلد وحدي حنين
وهو .. كنّه من الأحلام نَحت
كذا ضيق اليدين من / اليدين
مع نفسي و في نفسي سرحت
لمست فـ داخلي جرحٍ و تين
وخفت أكتب وبعض الشعر سُحت
أخاف اخدش ظهور الراحلين
وأنا عن ديرتي في الغيم رحت
أنا .. ماني .. نبيّ المتعبين
ولاني في السما نجمه ولحت
أنا عودٍ تكسّر في السسنين
على جمر الوجع و اليوم فحت
صرخت بصوتي المبحوح طين
على .. هذا التراب ولا ربحت
سكتّ و وجهي الثاني .. أنين
صرخ فيني من الداخل وصحت
واجيلك ../.. هم متكدّس طعون ../.. وشـرّده منفاي
ـــ واجيلك ../.. حلم يتمّه الحنين ../..وحشّم العابه..
اجيلك../.. شاحب جلد المدينة../.. والسكك .. والشاي
ـــ يمز التيه ../ .. ليين القى الشوارع ../..ضاقت ثيابه..
اجيلك.../ وادفن عيون الدفاتر ../.. واستفز بكاي
ــ يدثّـر لك ألم.../ مدري امل ماعدت.../ اقرابه..
لك الله../.. والمدى يحطب صباحي ../والغياب ..النااي
ــ متى اتريّق رجوعك../ من عرق صبرِ ِ.. تعنّـابه.. !
انا ماشره .. على طيب المسا/.. "والغرغرة"..وياي
ــ علي يشره../ والسهر كوخ ِ.../.. تبرّا منه احبابه..
تمريني ..ألذ من الذنوب ../.. واعتكف لـ اخطاي
ـــ واتوب .. / وينحني راس العطش../..بغتة.. يا محرابه..
وانادي../ منكسر مثل اليتيم ../ وتمضغين نداي..
ــ غبي .. وشلون ألظم لي طريق../... والحق اسرابه.. !
غبي.. هذا الشعور اللي.. يفصّل من شتاي../ غطاي..
ــ انا سايق عليك ../ الشعر الارعن ../ .. ودي ادفابه.. !!
يستدرج معاه الشحّ ../.. ودويّ وعودك ../ ومفناي ..
ــ الييين تسيّلك ../ فزعة ../ دموعي .. وآآتوضاابه
ياعمّي ../ يالشعر .. هندم مكانك.. واستعر مبداي
ــ تصدق !.. مانفع كحل الكلام ../.. ونفحة خضابة.. !
ياعمي ../ ممتلي موت .. وسكوت ../..وغطرسة منجاي
ــ وتجيني../ . مادريت ان الخيال ../ ان جيت احيابه.. ؟!
مثل ماتشوف../ جيت اجمع ../..جروح ِ مشطت دنياي
ــ واطمنها.. على لتغ الطريق ../ الدااااكن.. اسهابه
* *
واجيلك ../..واغفر لـ تيه الطعون ../..وتكفرين بـ "مااي"
ــ جميلك ماغرستيه../.. وحنيني منجله ../.. تابه
لهث وجه الحزن ../.. حتى تهدم ماادخل ..مبناي ..
ـــ عدا ذاك "الممات" اللي تخبرينه.. /.. على بابه..
.
-
هنِا نفس الحزن وهناك نفس الكرسي المهجور !
هذاك الريح ازجانا حنين وصب مالحنا
طلبنا شاي عريّنا الكلام وذاب فينا زور
سكتنا والسكوت العذب يشرب من ملامحنا
تسترنا ب سوالفنا أو انّه سولف المستور !
تحيّرنا وغطينا الدقايق قبل تفضحنا
تلعثمنا ب صباح مر بين الغصن والعصفور
نخاف يفتّش أوراق العنب صدفة ويلمحنا !
ولو ندري بأن الحب صحرا والمسافة سور
دفنّا كل لحظة انتظار ولا تصارحنا !
حبيبي في صخب هذا البلد فيني بلد مهجور
من أول يوم اخترنا متى احترنا ولا ارتحنا !
تغربنّا انا وهذا الحزين الكادح المكسور
ندور إندوّر ب ضيق المحاني ما يفرّحنا
تعبنا نسقي الدمع الأماني والأماني بور
متى تثمر عناقيد الثواني شوق يصدحنا ؟!
وإذا اخضر الغصن في غفلة الفرقا لقا وطيور
أحس أني كأني صرت غيري لا تصارحنا
هنا خلا بقايا شرهتين وخاطر مكسور
ياليت أنّا تشرّبنا ملامحنا ولا بحنا
حتى المدى .. يامدى .. خيّب طموحي.. سعه
ـــ خايف الشعر يتعب بي ... ويثني يديــه !
تعال ..واحصد ثمر تحنان غصن .... زرعه :
ـــ منجل غيابك .. وقطرة حلمي .. وغيمتيـــه
تعال .. لو ماشفع لي هالقصيد ... أجرعه
ــ واعطيك .. قلب ٍ تسوسن ود... يااخي مابيييه !
تعال .. اشممك موتي .. وشوف لتغ سنعه
ــ تعال أسولف عن التنهيد .. ياامقلتيه ..!
تعال... تشهق زوايا الكون .. في مدمعه
ــ شاعر ... يطيّر على زرقاك.. جنحان تيـه
كل بيت يتهندم .. جوع .. لاجل اصبعه
ــ وكل حبر.. يساور .. طوع .. قلب السفيـه !!
هنا .. مكان ٍ تكحل .. بانتظاري .. معه
ــ وكرسي .. يهفهف ملامح.. حسرتي .. قبل اجيـه
وينه؟ .. ينادي السكوت .. اللي حضن .. مطلعه
ــ تعبت اسهّر سماي ... ودفتر ٍ يشتهيـه
اذكر أن السوالف..لو حكى ... تسمعه
ــ ولو سكت .. ترتقي لهفة...على شفتيـه
صاحبي من فتن دربي ...وقربي قطعه
ــ خايف الشعر يفتن بي ... ويقطع .."يديـه"..!
خذيني يالدروب اقصى طموحك وادفني الخطوات
ـــــــ قبل تصحى بنا عين الغياب .. ولمحة سنينه
خذيني لاآآخر أسوار الفضاء ودوزنيه سكات
ــــــ وكبي طيشي .. وهذا استيائي ياثقل طينه...
عطيه من السهر عين .. ومن عيون الضما سهرات
ــــــ كذا والا كذا ..\.. ياما السهر( سهّرت) له عينه
زماني يوم انا حي ٍ ..عشقت...والتفت لي..وفات
ـــــــ وتفرعن وجه مـ سكينه ....وتبسم وجه سكينه
يااااانتي تلهث وجيه السوالف .. من رحلتي ..بات
ـــــ انا ..يسأل دفا رفوف الاماني عن (انا)....وينه..!!؟
احبك كثر مانصفي يموت... ونصفي اللي مات
ــــــ واحبك كثر ماجيتي... خيال ٍ مات تحيينه
و (انا )...غصت بي اوجاع الزمان.. وثخنة العثرات
ــــــ تعالي .. (ماتغيّر جرح )..\.. على ماحطت ايدينه
طفلتي / خليني الغافي على صدرك سنين
ايه ابشرب من عيونك ملح واحلام وأماني
افترقنا العام مثل الوقت هذا تذكرين؟!
يوم اجيب ايديني تسولف وانا (أنا) نساني
جيت اغطي كل حرف بي / تعرّت كلمتين
جيت اب اندهلك تعثّر في طرف إسمك لساني !
يوم أفتح شُرفة الغيمة واشوفك تضحكين
انزوي كلي على بعضي صباحات وأغاني
صرت أشبه في عيون الراحلين/الراحلين
كلما ضيّعت منّي رحت ادوّربي مكاني
ليه هدمّتي حدود الأرض وانتي ترحلين ؟
ليه خفتي خطوة التخمين والمشوار "جاني" ؟!
كنت اشبّ انفاس صدري ياتجين او ما تجين !
وآتناثر ف الشوارع ف الدفاتر ف المباني
كلما خدرّت برد الدرب جيتي تجمعين:
ما تكسّر من دفاي وما تيسّر من حناني
وإن سألت التين والتفاح والغصن الحزين
عن عناقيدك توارى / لين رمّاني رمَاني
مثل طفل قام يبني ل البحر احلام طين
مادرى وش كثر تعطي الملح أطراف المواني !
طفلتي خليني الغافي على صدر الحنين
ماضميت إلا امان ولا شربت الا اماني
كم قطفتك من زوايا الشعر نبت وياسمين
قرّبي خليني ازرع بين احضانك مكاني !
رد مع اقتباس
المشاركة الأصلية كتبت بواسطة رايق البال
