يقولون فيه واحد من العرب يقاله
حمود بن يحي الحترشي وحمود يقولون انه قناص ويجيد الصيد وانه من اهل الشمال
ومره من الايام راح حمود يتقنص في ارض ما هو ارض دياره ارض ديار قبيله ثانيه
صاد له خشف ريم في ارض القوم واعتدوا عليه وحاولوا ياخذون الصيد منه ولكن حمود عيا عنهم على صيدته وقاموا يضربون حمودوضربوه على خشمه وبعد مده طويله ورد عد يسمى (كراث) وهو يجبد الماء من العد فصك الرشا(الدلو) بوجه الحرمه بجنبه
وقامت تعيره وقالت : قد ضربوك القوم وما منعتهم.
فصدر من الماء بسلاحه يدور عن غريمه لين لقاه وقتله، وبعدها راح من ديرة ربعه وأهله وراح يم الأردن واخذ حمود يشتغل راعي غنم وحشاش(يجمع العشب) عند الشيخ المعروف نمر بن عدوان في الأردن ونمر ما كان يدري قصة حمود،
وبعد السنين الي ارمست وعقب ثمان سنوات شك بن عدوان في حب زوجته للراعي(حمود)وكان نمر وده يعرف من الوضع...
وعقب كم ليله قال لزوجته والراعي حمود انا مسافر وابيك تحفظ الحلال والعرب ياحمود، قال حمود ابشر ياعم والصدق نمر ما سافر رجع لزوجته في هاك الليل ويوم حست فيه قالت من بالبيت قال اناحمود وقرب منها فضربته على وجهه وسال الدم منه وتوكد من برائةحمود الراعي وراح لين برى الجرح واخذله شهرين تقريبا ورجع لهم الا ان زوجته لاحظت مكان الضربه ودرت بشكه فيها ..فطلبت منه ان تسير يم اهلها وقعدت عندهم ثمانين ويوم طال عليه غيابها قال هذه القصيده يشكي البعد عنهاوهي ابيات جميله جدا
بــرق شـلـع يـاحـمـود قـمــت استخـيـلـه
أخــيـــل بـــرقـــه يــشــعــل تـــقـــل نـــيـــران
يمـطـر عـلـى الرمـلـه وبـطـن السليـلـه
ويـسـقـي الـحـنـا مـــن مـفـاريـع وديــــان
حـــشـــاش يــاحــشــاش قــــــل الـسـبـيـلــه
عــــاود ربــيــع بــلادنـــا مــثـــل مــاكـــان
عـسـى بــلاد الـبــدو تـضـحـي محـيـلـه
حتى يجون البدو عجلين الاضعان
اعـطـيـهــم الـبـلـقــاء وبـــطـــن الـسـلـيـلــه
واعطيهـم النقـره عـلـى سبـعـة اركــان
ويوم سمع حمود (الراعي ) القصيده رد عليه بالابيات ويقول ابيات اجمل
يــــانـــــمـــــر يــــاحـــــامـــــي عـــــــقـــــــاب الـــدبـــيــــلــــه
فـــكــــاك ربـــعــــه يـــــــوم زوغـــــــات الاذهـــــــان
أن كــــــــان تـــشـــكـــي مـــــــــن ثــمــانــيـــن لـــيـــلـــه
فــــأنـــــا ثــــمـــــان ســـنـــيــــن والـــقـــلــــب ولـــــهـــــان
لـــــــي مـــــــن ورى مـــبــــدى ســهــيـــل حــلــيــلــه
لــطـــف الـحــشــا مـاشـفـتـهـا يـــابـــن عــــــدوان
ولــــــي مـــــــن ورى مـــبــــدى ســهــيـــل قـبــيــلــه
لــــــطــــــامــــــة لــــــلــــــشــــــره مـــــــــاهــــــــــم بـــــــــــــــــــذلان
عــــــديـــــــت مــــنــــهـــــم بــــالــــرمـــــاح الـــطـــويــــلــــه
عداء الضوامي من على جال معطان
ومــطــلاع نــجــم سـهـيــل لــــي بـــــه حـلـيـلــه
نـشــمــيــة تــســبـــي الــحــشـــا يـــابــــن عـــــــدوان
عـــــديـــــت عـــنـــهــــا بــالـــســـيـــوف الــصــقــيــلـــه
لـــــــو هـــــــي بـــحــــق الله مــاكـــنـــت زعــــــــلان
ويوم سمع ابن عدوان قصيده حمود عرف انه شهم ومن روس قوم عزيزه وطلب ابن عدوان من حمود ان يروح ويرجع مرته من عند هلها وراح حمود الحترشي وجاب مرت ابن عدوان من عند أهلها وأعطاها مطالبه واصلح الي بينهم.
ومن بعدها اعتبره ابن عدوان من اعيان القبيله وزوجه ابنته وعاش هناك الى الوقت الحاضر ويعتبرون فخيذه من الحتارشه نسل حمودمع ابن عدوان الى الوقت الحاضر في الاردن..
رد مع اقتباس