صحيح للشعر بـاب وللمشاعـر جـواب
ولا .. تزيـن العلـوم الا علـى حلّـهـا
وانا مـن البارحـه فاتـح للافكـار بـاب
كنـي علـى عالـي الرجـم اتبيّـن لهـا
يمكن اني اغيب ساعـه واستلـذ الغيـاب
وافتـح ملفـات عمـر ٍ راح .. وافلّـهـا
لكن ليا جيت .. جيت اسوق علط الرقـاب
ومن دونها انقـل سيـوف الهنـد واسلّهـا
ارقى المراقيب واجـاوب قنيـب الذيـاب
وجلّ الغوالـي .. تـرزّم يـوم اهوبلّهـا
اختار من صفوة الصفـوه مالـذّ وطـاب
واسوقهـا .. للعقـول اللـي تحيّـن لهـا
ماهيب في حب والا صـد والا عتـاب !
لاوالله الا علـوم ٍ تـوي اذهــن لـهـا
البارحـه ليلـة ٍ كـن بسماهـا ضبـاب
يامل عيـن ٍ جفاهـا النـوم .. يـا ملّهـا
سوادها اسود سواده مـن جنـاح الغـراب
من عقدة ٍ يتعـب الحـلال .. مـا حلّهـا
دنيايه ارخص بعيني مـن جنـاح الذبـاب
ماعـاد ابــي ياسمينتـهـا ولا فلّـهـا
حاسبت نفسي وضاقت بي وساع الرحـاب
كثرت خطاياي مدري كيـف ابـا اقلّهـا !
جاهرت بذنوبـي اللـي كنهّـن الهضـاب
وقصّرت في واجبات ٍ كنـت فاطـن لهـا
تبعت درب الخطاء واخطيت درب الصواب
اتبع هوى نفسي اللـي غـيّ ارضـاً لهـا
يالله وانت المجيب اللي مادونـك حجـاب
تقـدر تعـز النفـوس وتـقـدر تذلّـهـا
يامحيي الارض بأمرك من حقوق السحاب
اعـوذ بـك مـن ذنـوب ٍ عاتقـي ملّهـا
واعوذ من دعـوة ٍ تدعـى ولا تستجـاب
ومن كلمة ٍ مادريـت ابهـا وانـا ازلّهـا
انا بوجهك وجاهـك مـن شديـد العـذاب
عبدك ونفسي اليا اخطت رحمتك من لها !
ما أخذت للاخـره قبـل رحيلـي زهـاب
انا وناس ٍ معـي مانـي بمحصـي ٍ لهـا
كم واحد ٍ يطرد آمـال ٍ سـوات السـراب
شـي ٍ يبـي ياصلـه وأشيـاءً ماياصلّهـا
يجمع حطام ٍ .. مصيره للفنـا والذهـاب
ومـن الطمـع عنـده ان الارض يحتلّهـا
اغرته بنت الهوى والقلب الاقشـر شبـاب
وانساق معها وهي ما احـد ٍ خليـلٍ لهـا
ماحث رجله على درب الاجـر والثـواب
اسحرته المغريات وصـار .. عبـد ٍلهـا
في غفلته كم رقـد واصبـح وودّا وجـاب
اظله ابليـس .. مـع نـاس ٍ قـد اظلهـا
يشعب ركابه مع اللـي يشعبـون الركـاب
نسـى ان الايـام شجـره زايـل ٍ ظلهـا
لابـد مـن ساعـة ٍ مابعدهـا الا المـآب
الله مـا يهمـل عبـاده .. اليـا امهلّـهـا
هني من تاب لله مـن ذنوبـه .. وانـاب
زهد بدنيـاً .. مسـاوي كثرهـا / قلّهـا
مشى على سنـة محمـد ونهـج الكتـاب
تبـع دروب ٍ .. قليـل الديـن مادلّـهـا
مع مسبلين اللحـا .. ومقصريـن الثيـاب
قوم ٍ .. علـى طاعـة الله ياحلـو دلّهـا
منشى البنـادم تـراب ومرجعـه للتـراب
والروح امانه على من هـو وديـع ٍ لهـا
اليوم ( صفحه ) وعمر المودماني ( كتاب )
مـدوّن ٍ فيـه .. دق اعمـالـه وجلـهـا
ماضايع ٍ منه حاجه .. في نهار الحسـاب
كل ٍ يبي يشوف مافـي صفحتـه / كلهـا
رد مع اقتباس
المشاركة الأصلية كتبت بواسطة رايق البال
