من تجين
ماادري وش اللي يقلب الدنيا
ويخليها تزين؟
وش يجعل الأشيا كثير اجمل
وش يجعلك فوق العروش الأوله
في مملكات الفاتنين!
أحس ما كني بشر ..
في شوفتك أتحول نجوم وقمر
واضوي لك الظلما شعر
واغردك مثل الوتر
واقول للفرقا دخيلك لو سمحتي لا تجين .
من تجين
أعطرك عطرين
عطر اشواقنا وعطر الحنين.
واغيب في طيب اللقا
والملتقى والياسمين
أشرب من النشوة حياه
أسقي تفاصيل الحياه
واحياك ياكل الحياه
في ساعتين
ياانتي ترى ماكنت انا قبلك
ولا بعدك بكون ..
يا أول اطوار العقل
يا آخر أطوار الجنون.
يا إختصار العشق
والعشقات واللي يعشقون
لبيك لبيك وتراك اللي على كلي تمون
وشلون لا
وانت النظر وانت البحر
وانت السمر وانت الفتون
من تجين
أقول يا سبحان من سواك رب العالمين
يا أروع احساس تجاوز فلسفات المبدعين
شلال من فتنه ونور
سحر يذل الحور
ويهد الغرور
روز ثقيل
وحوله العالم تدور
يا درة الدر ونشيد الحر
ويا بدر البدور
يالين طبعك لو قسى
ياعدل قلبك لو يجور
انتي أبد ما تشبهين احد أبد
ولو كل زين بك تشبه
أو تقرب واجتهد
مالك مثيل الا المحال المستحيل المستحيل
جل الذي جلى جمالك
اشهد انه أكثر اكثر من جميل
من تجين يلفني صمت الخشوع
وافنى مثل ضي الشموع
واستلهم ابعاد الغموض
أخوض في جوف القوافي والعروض
اسيس جفال الحكي
واغيّض المعنى لغيوض
واصير شاعر في دجى الكلمه ينوض
اترجم اشكال الدلال
افسر إشكال السؤال
واعيش ما بين الحقيقه ونصفها -
وبين الخيال
رحال مابينك وبينك
اسج من عينك لعينك
واصير مرسول الملا
وسفيرهم مابين ايدينك
من تجين
اقطع خطوط الذاكره
واشطب على باكر
واكون في شرع الغرام -
الناسي الذاكر
إذا شطحت استجمعك
إذا تعديت ارجعك
الله يا الله يا الله ما أروعك
ملاك لكنك بشر
بشر ولكنك ملاك
عندك تعلمت الحذر
لجلك تعشقت الهلاك
أنا بلاي انك بلاي
وانتي بلاك اني بلاك
دنياك ما تنفع بلاي
ودنياي ما تنفع بلاك
من تجين أنسى اللغات
وخارطات الكون كله
والخواطر من سفرها تعود لكن مسفهله
أتنثرلك دروب
واشرق بليا غروب
واحلف اني عن هواك اللي ذبحني ما أتوب
كيف يمضي الوقت مدري
كيف يجري
كيف وانا في وجودك -
احلم وباسمك أهذري!
آه يا أتلى مدى واقرب مدى واطول مدى
كل نبض ان قلت احبك
ارتعش بي وابتدا
وكل حرف اليا شعرت انك ملكتيني شدا
حبنا الصوت الحقيقي
وباقي الحب الصدا
ولو يعرف اللي غدا بالحب مثل اللي نعرفه-
ماغدا
من تجين المطر يهدى
وترتاح العواصف
ويتجلى احساسي اللي غردت فيه العواطف
أطرب لكل الثواني اللي تمر
كل ثانية عمر
آه يا سرعك ويازينك عمر
فيك اطارد بين ميلادي وموتي
وافضح الشوق بسكوتي
واسبح بتسبيح راهب
مغرم بكل المذاهب
مهتوي ، مرفوع عن عقلي العتب
ولا يهم اللي يعاتب
دامني جاوزت حدك يالهوى
واعتليت اعلى المراتب
ومن يكون الحب همه
لايهمه
يقطع زمام الملام ولا يحاسب
من تجين
ما عاد يعنيني نهار
ولا غياب
ولا انتظار
ما دامك الشمس الحضور المعركه والإنتصار
ولا عاد يعنيني الكلام اللي يضيع
يكفيني اني بك اضيع
يكفيني اني بك ربيع
تشعبي في داخلي
لك ألف ديره وألف دار
استوطني كل الجهات
الغي مسافات الحوار
____
((تـــمدّنـا ))
والله ، وتمدّنا ..
وصرنا مانعَـْرف الشاي ..
إلا بثلج !! .
وكن الشاي مزروع بشوارعنا ..
وكن الناس تمشي في شوارعنا ..مع الإترنج .
يابنت كوني واقعية ..
بي صداع ، يحتاج يتبلسم على جالك ..
ولكن ..
مو بهذا البنج .. !
الغنج ساعة وينطفي
وانا اشتهي عمر يشعلل بي رجاف السرج !
زمااااا ن عدّت من هنا.. مراكب الإغريق
وعدّا من هنا ركب المُثنى..
وعدّوا بيض..
عدوا زنج.
العصر ( أذن ) ..
والغروب يلوّح بكفه تعال..
واحتال ..
أضحك على نفسي وأطمنها وأنا أرتج .
ماعاد في نفسي ظما
إلا لبوابة سما ،
أطقها.. وآهج .
النخل إلى منه كبر..
ينسى مواعيد المطر..
والبلبلة والعج !
روحي بتاريخ السحاب..
الله معك..
أنا ب أروح الحج.
(*)
ياغبية..
كل هالأيام مرت..
وانتي انتي..
تزرعين الثلج في جمري..
– بزعمك بانطفي - !
لا واللطيف اللي لطف
ماكان زرع اللي زرعتي..
كان هم ، وضاع فيني..
دوريه..
وإن لقيتيه اقطفي.
إحلمي ..
لكن وش آخر هالتماهي بالهروب..
أتحضّنك..
لكن أحس إنك معي ..
وإني معك.. بس مختفي ؟!
غلطان من يحكم على التغريد..
ماكل تنهيد يلجلج في الحنايا-
محتفي .
يا حالمة..
ماكل من يسكت حليم ..
ولا كل من زارك وفي.
(*)
وش رايك تشقي القناع..
وتمسحي لطخ الدهان
وتنزلي من فوق هالمسرح دقيقة ؟
وش رايك تكوني شعاع
ينبعث لآخر خيال بعتمتي مرة..
أو تكوني حقيقة ؟
مايفرّق هالنسا عن بعضهن..
غير إنهن يتشابهن في كل شي-
الا الطريقة ! .
الصخب والعدل الأعمى..
والمدينة والضجر..
نار وحريقة.
مانبي غصن يبس
مانبي وجه عبس
ولا نبي أصلا .. حريقة
إقربي أكثر من أول
طفلك المجنون الأول
جد شيٍ في طريقة.
بس لين الحين والله ..
في ظمااااااه
طايح ولا ابتل ريقه
بللي ريقه
____
(( لعـثمــه ))
(1)
لعثمة ..
كل ما باحه ، وما ودّع (فمه ) .
يجفل (الغرنوق )..
القاه..
ويِضيع إن جيت ألمه ..
ويتبعثر لون خده،
وألثمه .
وأفهمه ..
كنه يقول بصمت : ( يُمه ) !
وآتعوذ من غلاه اللي فتك بي ..
وأرحمه !
مذهول يلقاني ..
يداري دهشته فيني ..
ويشكيني لعيني
وفي الشفايا همهمة !
ما كان موعد ..
كان سلب من الزمن مجلاسنا ..
وأكبر غنيمة عشق .
كان إني أعيشه ، وآتجلى (وأنظمه ) .
ياهوووه .. يا دلوع أهلك
جيت أبا اهلك شوق (لولاك) وحضوره ..
إنت نوره..
كل ما صبّحت فيني ..
صارت الشمس بضحاها معتمة !
(أهواك ) .. ماهي من الهوى ..
يعني ولا نجم هوى ، وشق الهوا ..!
(أهواك) عكس الجاذبية ..
واتجاه الأنظمة !
تعال يابعد الزعل إنت -
وتلعثم بي رضا واجتاحني باللعثمة .
أصلا .. وش يكون إلغرام ..
إلا سلام .. ولعثمة ..؟!
أهواك كثر اللعثمة !
لعثمة ..
كل ما باحه وما ودّع (فمه )
(2)
ناحل السرجوف ..
حولك / كم تطوّى زول ؟
كم حول ٍ مضى لك في فنون السرجفة ؟! .
سرجفتني ..!!
شفني طويت ضلوعي بصدري عليك -
وقلت جيتك ..
لا ظلال ..
إلا خيال من كثر جور الوله ..
ماتعرفه !!
الكل يسألني عن اللي حتني ..!
وأسرح ..
وأدندن / راح .. لكن (حتني) .
و الناحل اللي كان يسكني رحل ..
ولا باقي إلا معطفه.. !
ما ألطفه ..
هذا الصغير المكتحل بالموت ..
هذا السكر المفتوت
هذا الانسياب برمشه المفلوت فوق رقابنا ..
وما أعنفه .
أستحلفه باللي خلق سبع طباق ..
يفكني من سيرة الفرقا ..
وحزات انتظاره .
ودي أجلس باقي العمر بفناره..
وأعزفه !
تعال يابعد الزعل إنت -
وتلعثم بي رضا،
واجتاحني باللعثمة .
أصلا .. وش يكون إلغرام ..
إلا سلام .. ولعثمة ..؟!
أهواك كثر اللعثمة !
(3)
مخملي الكبريا ..
بك رَزَة أول ماخلق ربي من التفاح ..
عالي .. مُشتهى .. رعبوب .
يبتدي سحر الغروب –
إليا تجَمّرت بحياك .
وإن شرّفت لفتاتك الخجلى شمالي ..
تستلج جْنوب !
البحَر غرقان بك ..
والموج في ساحل عيونك ينتخي بي .
والمنايا عاصفة ،
والعاشق أبحر يا حبيبي ..
والسفر مكتوب .
أسرفت في ذبحي ..
وأقول: إذبح بعَـد ..
واسترسل بهذا التجني وشوف حالك .. !
لا تظن إني بافرّط في دلالك
ولو فدع فيني دلالك ..
عنه لاوالله ، ما أظني بأتوب .
كيف أتوب..
ولامعي من باس موسى ..
ولا رحابة صدرعيسى ..!
ولا معي من حلم نوح ..
ولا صبر أيوب .. ؟!
أهواك ..
وما والله اتنازل عن آخر دُرة جُوَاك ..
لولك ومرجانك حلالي،
وأولك وأقصاك .
أهواك ، توي قلتها ..!
وباعيدها .. لين أفرح بلاماك ..
أو.. لين الجليد يذوب !
تعال يابعد الزعل إنت -
وتلعثم بي رضا ،
واجتاحني باللعثمة .
أصلا .. وش يكون إلغرام ..
إلا سلام .. ولعثمة ..؟!
أهواك كثر اللعثمة !
لعثمة ..
كل ما باحه وما ودّع (فمه )
___
جامليني
(1)
أدخليني ..
وإطفي الدنيا بحضورك واشعليني ..
....
كيف ؟؟
...
أدري إنك مافهتي شي ..
لكن .. جامليني .. !
أدخلي في أي عرق يخصني ..
واستعمري ذرات روحي ..
وعلميني الإنشطار .
قولي لتاريخ المراجل :
إستريح ..
وإفردي الأنثى على شط انبهار .
إقلبي وجه الحزن عني ..
خنقني ظله البارد
دخيلك.. إمنحيني لونهار .
ذلني هذا السمو اللي رفعني لوحدتي ..
مليت من عد النجوم البيض تحتي ..
لو سمحتي ..
ريحيني من جلاميد الشموخ بداخلي ..
وغازلي كبري بعطر الإنكسار .
إكسري هذا الجدار .
و أدخليني ..
وإطفي الدنيا بحضورك واشعليني ..
....
كيف ؟؟
...
أدري إنك مافهتي شي ..
لكن .. جامليني ..
(2)
كل شاعر يفترس أنثى خياله، في خياله ..
و مخلب الواقع يبدع في افتراسه لا صحى .
وكل شاعر ماسكن مثلك خياله ، شفت حاله
ماصحت شمسه ، على مركا التعاسة للضحى.
والليل ياليلى العصور الغابرة واليوم ..
لو غبتي يجيه النوم ..
ولو جيتي تخلى عن نعاسه ، واستحى .
يعني أحبك ..
منطقيني ، لاوجود لأي ميزان يساومني على الدوزان ..
جيتي .. دوزنيني ..
واعتلي كرسي الرئاسة ،
صالح الشادي انتحى .
الفرح هذا الخرافي البعيد ..
اشتقت له ..
قولي له إرحل من هناك ..
وزور هذا الناحل المطحون مابين السياسة والرحا
الرحاب تضيق بي
والعمر يستفحل شجر وأغصان ..
والعصفور ماغرد ..
ودستور الوناسة .. إنمحى.
إمحي التعب عني فديتك ..
واكتبي هذا مكاني ..
وكل حي بها الزمن حر بحلاله ..
وكل شاعر يفترس أنثى خياله في خياله .
وادخليني ..
وإطفي الدنيا بحضورك واشعليني ..
....
كيف ؟؟
...
أدري إنك مافهتي شي ..
لكن .. جامليني .. !