يالله وانا طالبك ياخير مطلوب
مطالبن ماهي عليك بصعيبه
اطلبك تغفر ماعليه من ذنوب
فزعتك للي يرتجيبك قريبه
والرزق لابن آدم ميسر ومكتوب
والمجتهد ماياخذ الا نصيبه
والفقر للرجال ماهو بعذروب
الرجل عذروبه الا باح طيبه
لا صار مابه طيب لو يملك شعوب
راس<ن> بليا طيب ماينبديبه
وان صار طيب صار ونعم ومحسوب
وقولة نعم ماهي عليه بغريبه
الطيب له باب ومناهيج ودروب
ولا يليق الا على من ضري به
يبغى نفوس وروس وعيون وقلوب
تحميه وان جت حزته تدعي به
ماهوب يكنز في دواليب وجيوب
مايكنز الا وسط روس<ن> صليبه
له قمة<ن> عليا وله وضع واسلوب
والعفرته والهنجمه ماتجيبه
والطيب لهله دايم الدوم منصوب
على وفا وافي وشيمه وهيبه
والطيب مايلحق هله نقص وعيوب
اللي حياته طيب ماشئ يعيبه
العيب للي يلبس الطيب مقلوب
مصيبة<ن> ياكبرها من مصيبه
مايستوي للي على الطيب مغصوب
الطيب ماعمره يجي بالغصيبه
رد مع اقتباس
