يا قليّل الجيّـة .. كبيـر المكانـه
ما غبت لحظة عن طواري حبيبك !
تدور الأرض ، وكل شي بـ/ مكانه
يا ليتها مـرّه تـدور ، وتجيبـك !
هنا بين الزهور .. و غيمة الود .. و سنا شمسك
هنا .. كانت مواعيد الغرام العذب بآخرها
هنا .. كان المكان يعطرّه روح و شذى همسك
هنا .. كل الحروف بطلّتك يبست حناجرها
هنا .. أجمل ورود العشق , قالت : يا غلاي امسك
نيابة عن مشاعر عاشق عيونك .. و شاعرها
هنا مرّيت .. مير آخر عهد بمْصافحة خمسك
ضحى صبّت عيونك حرّ دمعك في محاجرها !
تعبت اعيش لحظات العمر .. في ذكريات امسك
و تعبت اعدّ نجمات المسا الموحش .. و اسامرها
و على كثر الظروف القاسيات .. اللي تبي طمسك
تحاصرني ملامح وجهك البدري .. و احاصرها !
متى تعشب شرايين الخفوق بهمسك .. و لمسك ؟!
و تعيش اوّل مواعيد الوصل .. و تموت آخرها
للحزن في صدري حوابيط و عْذوق
يروى تفاصيلي .. و يثمر قوافي
ملّيت اردّد شعري بصوت مخنوق
و جفن الأماني ف / المسافات غافي
مرات اقول ان الشعر سبّة العوق
و مرات اقول انّه خوي ٍ سنافي
مرّ السحاب .. و لاح في صدره بْروق
و انا سنيني تشتكي من جفافي
انا الضعيف اللي من الطين مخلوق
و انا الحزين اللي جرحْه التجافي
لا تطوّل الغيبات يا حادي الشوق
والله ماني من جفاك مْتعافي
البال .. من برد الهواجيس محروق
و سمر الليالي .. مالها حضن دافي
و طيفك يساومني على دمعة الموق
و الدمعه اصغر من سموم الخوافي
جيتك معي قلبي و عمري ف / صندوق
امشي وسِط صُلف المقادير حافي
مالي على الغالي مشاريه و حقوق
ان كان ما هو بالأحاسيس وافي
عذرك معك من غبت يا حادي الشوق
عذرك سمين .. و عْذر شعري جفافي !
رمل الورق .. يشره على .. مزن حبري
قد له ثلاث شهور .. ما بلّ قاعه !
وانا .. _ على كبر المشاريه _ .. عذري
ما للقصيد احيان .. موعد و ساعه
في خلوتي .. ما بين سجّات فكري
و الليل .. حزّم ما بقا من متاعه
قال القمر : بآغيب .. ثم قلت : بدري !
قال : الضيا فالشمس .. واعكس شعاعه
قال : اتهقى بآموت ؟ .. ثم قلت : مدري
قال : العطا ما يموت بعد انقطاعه
يا صاحبي .. ما نزّل الوقت قدري
لن لي مع أهل القناعه .. قناعه
ذاك القمر .. يشبه مشاوير عمري
يعكس مفاهيم العفيف .. و طباعه
يا صاحبي .. خوفي من اهوال قبري
اليا ادفنوني .. _ فالتراب _ .. الجماعه
يضيق من كثر التحاسيف صدري
اذا ارتكبت ذنوب .. واهملت طاعه
مؤمن و راضي .. في غناتي و فقري
و مالي في غير إرضاء ربي طماعه
عساني القى خير في تالي امري
و القى شفاعه .. عند ربّ الشفاعه
رمل الورق .. زان بنواوير شعري
من بعد ما مزن الحبر بلّ قاعه . .
كان شبّ البرد فيني و احتما
احطب لبالي من الذكرى عمر ..
اتذكّر وش خذا القلب .. و رما؟
و الوجيه اللي على عمري تمر ..
وْ لا ذكرت اللي على حبّي نما
قلت : يا خالد ترا هان الأمر ..
العمر يفداك يا عذب اللمى
يا عذاب البيض .. يا سيد السمر
من عرفتك و السما ما هي سما
النجوم تطيح .. و يغيب القمر ..
تجري بجسمي مع مجرى الدما
و الحنايا لك مساحات .. و ممر
شف خفوقي عن هوى غيرك عما!
و شف غراسه كيف ! .. يا كلّ الثمر ..
الحلا فيك لثلاث اشيا انتما
للشهد .. و الطهْر .. و الورد الحمر
لا تضيق ان شفت عينيّ ابكما
ضحكتك سحْر .. و سواليفك خمر
ما يبلّل خافقي قطرات ما
لا غدى صدري من الوحشة جمر ..
صبّ لي وصلك .. أنا ميّت ظما
برتويه .. وْ لا على قلبك أمر
العمر واحد .. نقص و لاّ نما
و انت حبّك شي واحد ف / العمر ..!
اللـي ينافسني و أنا حي / بـ الروح
ما هو مَلَك .. لكن عن العـالم / يـزود ..
غيـره سحابة صيف .. يومين و تروح
وحبـه مثل وحمـة على جلد مـولود .. !
القصآيد لـ خآلد سعد الدوسري
المدخل والمخرج لـ خآلد المطيري
رد مع اقتباس
المشاركة الأصلية كتبت بواسطة رايق البال
'
