من حضن هذا الجفاف وغفلة ايديني
احتاجلك تاخذيني من عذاباتي
ياكل كل القلوب اللي توديني
ل اجمل صباح ٍ زرعته في حكاياتي
احتاجلك للضما للحلم لسنيني
لجروح زاهي مطرها في كتاباتي
ذكراك تمطر سحابتها وتغريني
اركض وارتّل تحتها لك نداءاتي
عن كل وجه وطريق وموطن انفيني
ل عيونك اللي بها كل انتصاراتي
جيتك من الصدق تشرَق بي عناويني
واحس بالضيق بي متوسد جهاتي
اشرب سكوتي , واحسك في شراييني
تستمطرين ف حظورك كل بهجاتي
وينك؟ وصاح السؤال ف داخلي ويني ؟
فتحت بابه وطالت بي مسافاتي
من قلت احبك وانا المطلق جناحيني
انطر تجيني من آخر آآآآخر ( الآتي )
مريّ بصمتك على صمتي وصحّيني
كم سالفة شوق بي نامت على شفاتي
طارت عصافير قلبي / لك تناديني
واغصان قلبك : بداياتي نهاياتي
طفل ٍ رسمتك على صفحة بساتيني :
طفله تسوق المطر ل اجمل حكاياتي !