امر بيتك كل ما خاطري ضاق
من شان اخفف حر الاشواق فيني
امر وعيوني كما عين بواق
وانا عزيز وبهذلتني سنيني
يسوقني قلبٍ على البعد ما طاق
وليا عسفته عافني ما يبيني
ما يعترف بانه حصل بعد وفراق
ولا يصدق لوعتي مع ونيني
لانه كتب حبك واسمك بالاعماق
واخفى غلاكم في مكانٍ اميني
يا ما تسامرنا سواليف وعناق
واشواق ترسل بين عينك وعيني
وياما نسجنا بالهوى بيض الاوراق
والختم والتوقيع في دمعتيني
وليا تجمعنا هدة كل الاشواق
وعند الموادع نشتبك باليديني
لبيه يا ثغر كما ضو براق
ليا تبسم واحرج الوجنتيني
اللي سوالفه على القلب ترياق
ربي عطاه كل وصف حسيني
رد مع اقتباس
المشاركة الأصلية كتبت بواسطة رايق البال
'
