السلام عليكم و رحمة الله و بركاته .. هل مره تفكرتم في هالعبارة؟؟
نقولها دائماً و لكن هل حسينا فيها..؟
"السلام عليكم و رحمة الله وبركاته" دعاء أن يرزقكم الله بالسلام و الرحمة و البركة !!
هذي من ابسط الأشياء اللي مفروض تعطينا إيجابية في بداية كل يوم من الأيام اللي نعيشها في هالدنيا.. نحوّل الامور البسيطه و العادية و التافهه في نظرنا إلى إيجابية و أمل و تجدد..
بأمانة..
كثير لاحظت الناس صاروا سلبيين في كثير امور حتى الأشياء اللي ما تسوى كل حاجه صارت سلبية حتى الأمور اللي مالهم دخل فيها..
بعطيكم أمثلة عشان شوي تعيشوا الجو ..
زمان كنا نسمع فلان خطب فلانة و توفى أبوه .. طلقها لأنها نحسة عليهم (شر البلية ما يضحك)
خلونا نحوّل هالسلبية لإيجابية .. كيف؟؟
في هذه المرحلة اخترت انسانه و قررت تعيش باقي عمرك معاها .. الله رزقك هالانسانة عشان توقف معك في أصعب الظروف قبل أحسنها.. وفاة والدك "لاسمح الله" قدر و مكتوب
ووجود هالانسانة في حياتك عشان تساعدك تعدي هالمرحلة الصعبة من فقدان شخص غالي عليك..!! "فهمتوني"؟؟
السلبية صارت مسيطرة علينا بدون ما نحس لدرجة انها صارت سهله في الانتشار بوجود وسائل التواصل الاجتماعي..
الانستجرام!!! تعليقات الناس تحت صور المشاهير و خلوا نفسهم بحكم القاضي "انتي تدخلي النار مطلعه شعرك" " شوف شكلها كأن ..... " ... و طبعا تعليقات لا تنتهي..
انا كنت اتابع المشاهير بس صرت ألغي المتابعة لهم بسبب تعليقات الناس!!
من خلانا "القاضي" ... من خلانا نحكم انها او أنه يدخل النار؟
فيه وحدة من الممثلات العمانيات شفتها و طبعا هي وحدة من الناس اللي ألغيت متابعتي لهم بسبب تعليقات الناس..
مرت جنبي و قالت "السلام عليكم و رحمة الله وبركاته".. و قبلها مرّوا علي ناس مو مشاهير ولا معروفين بس محد سلّم!
نروح للعمل شوي:
صارلي موقف مع وحده من زميلاتي ,, عطوهم شغل زياده خارج عن مجال عملها و لكنه بسييييط جدا و لكن ردة فعلها كانت جدا عنيفة
" انا ما جيت من بيت أهلي لحد هنا عشان اسوي هالشي" "خليهم يزيدوني راتب" "ما فاضيه حالهم"
ليش؟؟؟؟
استغربت ردة الفعل هذي و جوابي لها هو كلام أوجهه للكل:
أولا نخلي ف بالنا أن العمل عبادة و أي حاجة نعملها تكون لوجه الله.. عشان الله يبارك لنا فيها.
ثاني شي: أي حاجه جديدة نسويها ف شغلنا تكون إضافة جميله لخبرتي العمليه و ليس عبء إظافي!
ثالث شي: ما نطلب مقابل إلا بعد إتمام العمل و يكون عملي بأكمل وجه و صدقوني ماراح ينتظروكم تطلبوا .. تقديرا منهم على جهودكم راح تحصلوا على شي في المقابل
هذا من غير الاحترام اللي راح نحصله منهم بسبب تعاوننا ..
نحن ما نقدر نتهم و نشير بأصابعنا خلي فلان يعدل نفسه و لكن نبدأ بنفسنا!! ابدؤا حاسبوا نفسكم .. و انا أولكم بحاسب نفسي..
تعليقاتنا نحاسب عليها و كلامنا مع الناس و مناقشتنا مع أهلنا و ربعنا ..
أتمنى الموضوع يفيدكم ..
و أتمنى الايجابية في التعليقات و تشاركونا بأي موقف صادفتوه.
رد مع اقتباس
المشاركة الأصلية كتبت بواسطة ندى^_^
