^-^ شعورٌ يلامس نبضي °~° ®

[Raba]

أتوقع الناس الي كانت تلاحظ مروري في السبلة قليل جدًا
لاني كنت بعيدة كليًا عن المحادثات القريبة فقط أشارك
واكتب يومياتي في المدونة واقرا المدونات والخواطر
ملاحظة شخص مثلي قد تبدو صعبة ولكن ليست
مستحيلة الا اذا كان متابع بصمت للمدونة او لتفاعلي
عموما انا جدًا ممنونه لكل السعداء من اجلي
وأتمنى كل إنسان يعيش فرحة النجاح في اي شيء
يسويه حتى لو كان إنسان مش دارس النجاح وحده
درس من الحياة ما يحتاج له شهادة إثبات

من رجعت السبله
يمكن اكثر وحده زارت ملفك انا
لانك بالنسبه لي مجهوله
وبقسم الفنون
وكنتي هذيك الفتره مختفيه
وبخاطري اقول من تكون
بعدها شفت ف توقعيك حاطه ضي الشمس
اذا ما خاب ظني هالمعرف مر علي سابقا

ع العموم ياعزيزتي
الله يوفقك ويسعدك
وترجعي البلاد بالسلامة

امين يا رب العالمين وربي يوفقك ويسعدك
عزيزتي حافية القدمين أولا شكرا لانك واجد تشوفي معرفي بس انا ولا مرة ركزت الا الحين رحت اشوف من شاف ملفي هههه فتحتي لي باب اعرف من الي يسال ومن الي يطنش ع إساس بسوي سالفة هههه .. عموما شكرا أيها الفضولي الي كنت مجهول هههه ،، هو ضي الشمس كان حتى مقل في التواصل بس فيه بصمات في النقاشات العامة والخواطر والصور وأمر على مواضيع ترويح القلوب هههه .. انا كان فيني فضول اعرفك واتابعك بصمت ههه كأني افت الرمانة بس مسويه نفسي ثقيلة عبارة

[Raba]

الحمدلله وصلوا اهلي كنت المطار ورجعت الفندق وبعدها جبتهم البيت لان شك ان ساعة 2 وكأن وقتها ساعة 8 والحين انا رايحة العيادة وهم في بيتي برجع لهم بعد الجلسة ان شاء الله

[Raba]

ممم مختصر هذا اليوم الجميل .. تاريخ 18/12/2019
طبعًا نايمة ساعة 2 و40 يمكن الفجر من الحماس ع إساس زميلي علي يمر علي ونروح المطار نجيب اهلي وقالي رابعة اتصلي علي ساعة 5 عشان تتأكدي اني ناهض قلت تم وطبعا نمت متأخر ونهضت على اتصاله يقول باقي 20 دقيقة وأوصل عندك انا أقوله لحظة نتفاهم انا الحين صاحية ساعة 5ونص بصلي وبتجهز وبنزل يمكن أتأخر بعد عليك قال عادي تخيلوا رحنا المطار ساعة 6 و40 يمكن عاد اهلي واصلين بس يأخذوا اغراضهم طلعوا ساعة سبعة وشيء وانا ماسكة في يدي 4 دبب ماي بابا يتصل يقول وينك انا أقوله هنا وينكم طلعوا هم خلفي قلت لا احد يجي يسلم اريد اصور هالاوقات وفي الأخير طلع الفيديو ما متسجل فيس زعلان وعاد علي من امس يسال شو بينادي ابوي ومن اسم اخوي الكبير اخر شيء قالهم اخباركم ابو رابعة وأم رابعة هههه ورحنا الفندق والسوالف في السيارة كان علي مستحي وبعدين شاف ان الوضع عادي انا واجد امزح مع ابوي وامي وعاد خذ راحته في السوالف وصلنا الفندق وما صار نسوي تشك ان رحنا شقتي وفرشت لهم المكان وطلعت جلسة علاج ورجعت انام لقيتهم نايمين وع إساس عندي موعد في بيوتي فيشل ونهضت متأخر وراح الموعد بس رحت لهم ولقيته المحل مقفول متخيلين لو نايمة ومكملة النوم احسن المهم رجعت البيت لقيت أمي صاحية وجالسة تسوي لها قهوة وأبوي نايم وصحى راح يصلي وطلعنا الماركت نشتري فواكه وخضار ورجعنا البيت وبعدين طلعنا مرة نشتري اكل عاد ساعة 6 نتغدى ونتعشى ونفطر طبعًا عيوش وامي نظام كيتو جبنا لها مشاوي وكملنا ضحك اخر شيء صار ساعة 9 لازم اوديهم الفندق طلع بطاقة أمي منتهيه وبيسوا لها جديدة تأخرنا شوي ع قطار وكان الحين واصل وقلت لهم بابا وماما ركضوا صدق وركضوا وانا اضحك وصلنا جالسة اغني لهم اركض اركض هههه قبل لا نطلع معطتنهم فيتامينات أقولهم كله من الفيتامين ولا ما كان تقدروا تركضوا واخرتها ابوي صور فيديو بعد الركض بس لذكرى قلت لهم عقبال ما تصوركم وانتوا تركضوا مرة ثانية للقطار ههههه

[Raba]

ابوي وامي جالسين يتناقشوا ابوي ما يبي اني البس بلوشي مع لبس التخرج لان انا ما بلوشية اوين وماما تبيني البس بلوشي لانه حلو هههه وانا ما اعرف من ارضي أمي ولا ابوي عموما جايبين لي لبستين أمي بتلبس بكرة لبس طويل وابيض ( عرسي يعني ) وأبوي بيلبس دشداشة عمانية ،، المهم وقت استلام الشهادة انا بلبس رسمي بنطلون عريض اسود وقميص شبك ابيض وشيله سوداء ان شاء الله وعلى بكرة اشوف الوضع عاد

[Raba]

يا رب بلغ قلبي سعادته 19/12/2019 بداية يوم جميل وحلم محقق يبدو اني على شك الانتهاء من مرحلة التوتر والقلق فانا على مشارف قليلة جدًا من التخرج لا يمكن وصف شعور النجاح انا اقاسمكم اليوم الفرح والسعادة رغم المشوار الطويل الشاق والأيام الكئيبة والعزلة والوحدة كل ذلك مضى بانشقاق وانفصل عني فجأة ،، انا حقًا أواجه الأيام السعيدة برحابة صدر ،،
لا يدرك احد عن المعاناه التي يقاسيها الطالب في ملبورن فهم يظنون اننا نجحنا دون ان نخسر
لقد احتضنت مع نفسي الكثير من الناس الذي يعانون اليأس والحياة الصعبة والغربة والعنصرية وقد كنت بالأمس مكانهم
رغم ذلك مررت من خلال هذه التجارب وكبرت ونضجت فالعزلة نفسها علمتني ان ابتسم لنفسي وان افكر عميقا وان اقرأ كتبًا ثقافية
علمتني الحياة ان أشارك الآخرين تجاربي ليتعلموا منها ،،
كنت في بعض الأحيان لا اود التحدث مع الطلبة اليائسين من وضعهم هنا لاني كنت محطمة من الضغط الذي أعيشه رغم ذلك كنت
اشجعهم وامنحهم الحياة دون ان يدركوا اني اريد نفس الفرصة ونفس الحديث لأعبر عن مشاعري .. انا سعيدة حقًا لما انتهيت عليه
6 سنوات من الغربة من العطاء كانت كفيلة لان اكون أقوى وتكون حياتي مستقلة والأجمل ان اكون نبيلة مع الآخرين ومع نفسي في هذه الغربة
انا ولدت صبورة كبيرة امرأة منتفضة على العالم تدرك حقوقها وتقرا علم الجرائم بتأني لتفتح لنفسها المستقبل في اخراج كل الأدلة التي تثبت المجرم

لقد كتبت كثيرا ولكن قد ذهب هباء لا اعلم لما

[Raba]

بالأمس لقد جددت عهدًا جديد مع الحياة فان القادم لا زال يجهلني ولازلت أجهله
سأروي كيف كانت سعادتي بالتخرج فانا من شدة الفرح اريد الاحتفاظ بكل الذكريات ،،

طبعا قمت من النوم عندي جلسة علاج الصبح رحت للمعالج عطاني هدية التخرج والسنة الجديدة ماسكات وجه غالية الثمن طبعًا هذا المعالج من اجمل الناس الي التقيت فيهم كيف هو متعاون وحبوب جدًا وأخذ حتى اكثر من الوقت المطلوب للعلاج بس عشان هو مخلص في عمله وكل مرة ادفع له نفس السعر لساعة حتى لو عالجني ساعة ونص .. المهم فرح لما قلت له اهلي وصلوا وانا بتخرج وزعل شويه لان باقي جلستين قبل لا ارجع عمان واكمل الجلسات فيها ،، المهم رجعت البيت ساعة 10 وخمسين دقيقة يمكن ورحت اطبع التذاكر وأخذ شاور وانشف شعري المهم وصلت فندق ابوي وامي ساعة 2 ورحت اريد نطلب اكل اخر شيء نزلنا نشتري كباب وجات سمر من جيلونج عشان تحضر التخرج وصارت ساعة 3 و 45 دقيقة وما مسويه مكياج ولازم أكون هناك ساعة 4 عشان الحفل الساعة 6 فسويت لي مكياج بسيط ورحت التخرج واستلمت اللبس كنت في لاين انتظر دوري وبعدها شفت إنسانة انا واجد احبها برناديت عجوز شعرها ابيض بس هذا من اول يوم لي في استراليا لحد مشكلة الفيزا مالي هي كانت معي وتساعدني وتعصب لما احد يكلمني بطريقة قاسية تروح تواجهه وتناقشه واجد حبوبه هي مال HQ خدمات الطلاب ولما شافتني صرت تقول أنتي اليوم تخرجك وحضنتني وحضنتها وجلست اصيح يعني تخيلوا أنكم ما راح تشوفوا هذا الإنسان الي دوم حولكم ويساعدكم وهي جلست تصيح قالت رابعة أنتي مثل بنتي كيف ما أنتي محترمة انا احبك وانا اعرف ان اليوم هذا يوم عاطفي بس أنتي نجحتي وعديتي واجد مراحل دام انك سافرتي واغتربتي وكنتي وحدك فأنتي ما يغلبك شيء بعد حبيبتي كيف هالانسانه كيوت حضنتها قالت من جلس معك قلت لها أمي وأبوي وسمر بس ما كنت اعرف اذا جوا لانهم جايين مع سمر عاد قالت بلتقي فيك بعد الحفل اسلم على اهلك قلت لها تم ،، وجوا الشباب سامي وعلي يريدوا يصوروا معها قالت انا ما اصور بدون رابعة انا عارفه عاد صورنا مع بعض بس ما استلمت الصورة هههه ..

في الحفل انا ثالث اسم ينادوني الأول ولد ما ادري شو تخصصه بعدين قسمنا اول عبدالرحمن ( زميل الدراسة عماني ) وبعدها انا وبعدها سامي (سعودي ) وعلي ( سعودي ) طبعًا كلنا في نفس التخصص ما في بنت غيري محجبة ولا في بنت بتخصصي نحن من الناس القليلة الي درسوا هالتخصص عموما في الكراسي مع بعض جالسين والمسخرة على الأسامي وعلى الحفل كان المصور مضحك يصور اي واحد ما منتبه ومن غير حركات الخريجين العبيطة مبين ما وجه تخرج نحن عاد لما ينادونا جالسة اعطي الفريق التعاليم انه احني راسك وخلي يدك على راسك تسلم على البروفسور والدكاترة احترام لدرجتهم العلمية بس الي سوا كذا عبدالرحمن انا الي علمته حطيت يدي كتفي واحنيت راسي احيي الدكاترة والبروفاسورين الحاضرين هناك وسلمت على البروفسورة الي تسلمنا الشهادة بس الحفل كله جالسين نتمسخر ع الأسامي احد اسمه كخ وعبدالرحمن قالت اسمه الخماسي وجالسين ننكت عليه نقول لما نادوا اسمك بغينا نام ما خلصت هههه وسامي بدل عودة مكتوب حرف O وينطق او في التخرج قلت له طيب ع الأقل يقولوا باك بدل عودة هههه جلس يضحك وواحد هندي اسمه اكبر من حياتي الجمهور كله ضحك ىصفق اخر شيء لما طلعوا البرفسور والدكاترة سوا لنا أغنية I’m happy ترقص بصراحة هههه وصار الربشة في الخريجين وعاد لقيت اهلي في خارج القاعة وامي حضنتني تصيح انا من الفرح ما اريد اصيح بصراحة كنت فرحانه بس ما احس متخرجة المهم جات برناديت وسلمت على اهلي وباركت لهم وقالت كذا كلمة حلوه وعطيناها شعار عمان وعود اصلي وبعد عطتني رقمها الشخصي وهذا نادر هي تسويه احترمها جدًا قالت اريد اعرف اخبارك وأبوي لما جالسين تعرف على هناقره هنود قالهم بنتي تتخرج بتخصص الفلاني عطوه كرت العمل قالوا اذا تبي تتوظف خبرنا واخر شيء شافوا ابوي وجو عندي سلموا علي قالوا حلوه بنتك انا قلت لهم شكرا بس شيء وظيفة خلصوا مجاملات جلسوا يضحكوا هههه .. عاد راحوا نحن رحنا نصور مع المصور حركات استهبال وكذا انا وأبوي زايدبنا الجنون هههه وخلاص شلت الكعب ولبست جوتي رياضة وطلبت اكل ورجعت اهلي البيت ورجعت الفندق وهناك شفت اكثر من ظ،ظ*ظ* رسالة تهنئة حقيقة كنت راجعة بلبس التخرج ومع اهلي في الترام والناس تشوفني وتهني شعور جميل وعاد لما شفت الرسائل الجميلة فعلا حسيت اني خريجة وحسيت بالفخر يعني شفت كميه حب الله لا يحرمني منها ربي يسعدكم ويوفقكم جميعًا والله حسيت العالم كله كان جزء من هذا النجاح الحمدلله اهم شيء سعادة أمي و ابوي حبيت انهم كثير كانوا فخورين فيني الحمدلله ..

[Raba]

قبل امس الاهل ريحوا في البيت بس رحنا نجيب السيارة من عند اسماء بالليل وصلنا علي لانه جاي يبي يعطيني شيء وأصلح اللابتوب ماله شويه متعفس المهم رحنا عند اسماء وتخرجت كذلك وباركنا لها وأخذت السيارة رجعنا نسوي لها بترول ونغسلها طبعا مغاسل السيارات في استراليا تعتمد على نفسك كيف يعني تدفع دولارين وتنظف سيارتك وحدك بس هم يعطوك الأدوات فقط يعني الشغلة ذاتيه وعاد انا ابوي مره هو يرشني ماي وانا جيت اسوي صابون وبالغلط رشيته هههه قال بجيك تو ترا ههههه خربت عليه بس كان ممتع ومضحك

[Raba]

امس رحنا نسوي آيل لسيارة ونشتري لحم كنا بنروح نشوي في جريت أوشن رود المهم من الصبح قائمين عشان نروح آخرتها اشتلينا ساعة 10 وشيء المهم الدرب ساعتين وانا اسوق لانه عكس سيارات عمان لو ابوي بنسوق كنا مايتيين بندخل رون سيد هههه ،، وصلنا جريت أوشن رود ورحنا الشلال والكهف سوينا تغطية كامله لرحلة فيديو مع شويه تخويف لانه مكتوب المكان في أفاعي وامي تخاف وعاد رجعنا البحر نشوي شفنا ببغاء جايات صوبنا كانن واكلنا هناك بس كمية البرد زينة بس الهواء شديد قال ابوي خلا احسن ما اريد اجلس بردت هههه عاد رجعنا المهم في الطريق اوين ناموا عني بعدين ابوي قام هههه عاد جلس يسولف معي لحد ما وصلنا لما وصلنا رحنا نغسل الملابس والحين تذكرت اني ما جبتهم من النشافه بروح الحين مع السلامة

[Raba]

اعتذر من الجميع الحين انا ما اتواصل ولا ارد على المواضيع ولا أشارك لاني مشغولة مع الاهل وحدي بالليل عاد اكتب المواقف

[Raba]

رحلة اليوم كانت متعبة الصبح ساعة 7 شيء عشان أعير مكان السيارة لا تأخذ مخالفة بعد كذا رسلت لي صاحية السيارة انها تبي تروح المطار فوصلت لها السيارة ورجعت بالقطار بملابس النوم تخيلوا ع إساس ترجعني البنت قالت أوصلك المحطة بس قلت تم .. رجعت فطرت ورحنا حديقة الحيوان ظهري تعبني من المشي ميته جوع شفنا حيوانات واهمها الكنغر هههه
الجو كان بارد بعدها صار حر متقلب الوضع .. رجعت على طول نمت ساعة 7 ونهضت ساعة 9 رحت اشتري اكل لاهلي وبعدين رجعت طلعنا نشتري أغراض وفواكه وكذا من ولورث ..

امس رحنا الستي التقينا بسمر رحنا مكان اثري للذكرى انزاك صورنا كالعادة وبعدها جالسة تقولي سمر اهلك جدًا مريحين بسرعة دخلوا القلب وبمره سولفت معهم الحمدلله على هذه النعمه .. وعشان كذا كانت ملانه قالت بطلع معكم رابعة قلت لها افا عليك نحن نجيك سمر فقدت ( توفى) ابوها الحين سنة وامها متوفية من لما هي صف 3 كانت الله يرحمهم يا رب ،، بعد كذا رحنا ناكل بعدها رحنا سانكلدا بيتش شفنا البطريق كانوا ع المغرب يجون الساحل طبعًا وقتها كان برد يضحكني ابوي يقول شعري متجمد وراسي بارد اكثر من جسمي جلست اضحك أقوله عشان التجويف عندك برد عاد جلسنا ننتظر الترام رقم 16 عشان نرجع البيت في الانتظار خليت راسي على كتف ابوي يده بارده ومسكتها لان انا ما احس بالبرد كثرهم اصلا جسمه ينتفض اقوله بابا بردان يقول لا عادي قلت لامي بعد شوي ابوي كذا يتكلم ممممممم مع رعشه قالت أمي شو تيس وجلسوا يضحكوا رجعنا البيت اكلنا ونمنا