( ... ❤ كان لي عندك حكايه ❤ ... )

[رايق البال]

قصه بقلمي / الكل انضرب .. الا انا ..!
رابط القصه بالارشيف

http://archive.omaniaa.co/showthread.php?t=693046


يسعد مساكم / صباحكم
هلا بالجميع ...

من جديد نلتقي وقصه كانت لي زمان ..
وانا بالثالث الإعدادي او التاسع مثلما الحين يقولوا وبصراحه مش مقتنع بسالفة هالمسميات التاسع والعاشر احسها غير لما تقول اول ثانوي وثاني ثانوي هههههه ..
المهم نرجع لموضوعنا ..
زمان وانا بالإعدايه العامه كان عندنا مدرس مصري ولازلت للحين اذكر اسمه وكان يدرسنا الرياضيات واسمه محمد طاهر ابوالسعود ..
هالمدرس عصبي وايد والكل يخاف منه وطبعا الرياضيات اظن الكل هالماده معقدتنه ههههه ..
كان هالمدرس كل يوم لما يدخل الصف يقول لنا : بكره تسميع جدول الضرب ..!! وبعدين يبدأيشرح الدرس .. وتجي بكره ويقول نفس العباره وبعدين يشرح درس اليوم ومن كثر ماكان يقول هذيك العباره وينسى .. تعودنا انه ماراح يسمّع لنا وخلاص قمنا مانحفظ جدول الضرب ...
لحد يوم من الايام .. اول ما دخل الصف قال وبكل ثقه : تسميع ياولاد اليوم للكل جدول الضرب ..
هو قال تسميع .. إلا والربع انصدموا واولهم انا .. اللي بلع ريقه من الخوف .. واللي عيونه طلعت.. واللي انتفض وحالته حاله ههههههه لأن الكل مش حافظ طبعا..
الفصل كان فيه اربعة صفوف وبكل صف 10 طلبه وكان عددنا ( 40 ) طالب ..
بدأ بالصف الاول ..وقام اول طالب وطبعا ماله داعي اتوقع اوضح شو كانت حالته ذيك الساعه هههههه .
سأله الاستاذ : 7× 8 = كام ياواد ؟
الطالب :7 ×8 ، 7 × 8 .. وقام يرددها ..
الأستاذ : آآه 7× 8.. ايه مش عارف ..!!؟ افتح ايدك ..طاخ . طيخ .. طووخ هههه انضرب الولد .. وانتقل الدور للي بعده ..
ونفس الشي من حيث السيناريو والاحداث هههههه . انتهى الصف الاول .. وبعده الثاني .. وبعده .. الثالث .. ووصل للرابع ..
والكل انضرب ..
انا كان مقعدي بالصف الرابع قبل الاخير .. وانا الاحظ الاستاذ بدأ يقرب كنت افكر وبسرعه اشلون اتخلص من هالموقف لأني راح انضرب يعني راح انضرب .. قمت وبسرعه انسدحت ع الطاوله ..
الاستاذ يقرب وانا قلبي يدق من الخوف لحد ماوصل عندي .. لازلت لحد الحين اتذكر طرف عصاه والله وهو يلكز بها كتفي ويقول : مالك ياواد ؟
رفعت راسي بصعوبه وانا انظر له بنصف عين وبديت اكح وانا اطلع الكلام بصعوبه وقلت له : استاذ مريض وايد ..حمى فيني وكحه ..!! سبحان الله مدري اشلون الله هداه وحنن قلبه هذاك المدرس وقال لي : مريض ولسه قاعد ..!!؟ قوم اطلع يابني وروح العياده بسرعه ...
هو قال كذا .. إلا وانا حسيت قشعريره بجسمي .. مدري فرحه.. مدري خوف..!!!
قمت من الكرسي بتثاقل وجلست اجمع كتبي بكل هدوء اعصاب وطبعا عيني بالارض مش قادر اطالع الشباب لأني اعرفهم بياكلوني ذيك الساعه هههههه ..
وانا اتحرك بين الطاولات عشان اطلع كنت اسمع همساتهم اللي ولا اروع طبعا ههههه ...
- مريض هااه ؟ انزين ماعليك
- بتشوف كيف بنسويبك ... خلي بس الحصه تخلص ..
- فجأه يتك حمى وكحه هااه ..!! جنابك على راسه ريشه انه ماينضرب .. بس دواك بعدين صبرك علينا بس ...
الخ من هالتعليقات اللي تشرح الخاطر وتفرح القلب هههههه ...
كل هذا وانا ساكت وكاتم ضحكتي مع اني ميت من الضحك والله بس مش قادر اضحك .. لأن لو ضحكت وانكشفت خطتي راح اروح فيها من الاستاذ والطلبه مره وحده .. طلعت وبسرعه قفزت من السور وركبت سيكلي وعلى اقرب دكان شريت عصير عشان ابرد على قلبي شوي بعد هذيك الوصله الساخنه من الخوف والتخطيط ههههه .
وصلت البيت وشفت الوالده والوالد - الله يرحمهم - واستغربوا اني راجع بدري ..
حكيت لهم القصه وقلت لهم .. والله ماراح اداوم يومين على الاقل .. عشان الشباب شوي يهدوا وتخف حدة غضبهم ولا بيضربوني ضرب من خاطر تراهم هههههههه ..
ولأني وحيد والدي - رحمهما الله - وافقوا ..
وفعلا بعد دوامي عقب يومين كانوا الشباب ناسين السالفه وانتهت القصه بسلام ولله الحمد ..
انتهى ..
اخوكم / رايق البال

[رايق البال]

قصه بقلمي / وكمان بتصفّر .. دي هزلت بقه ؟
رابط القصه بالارشيف

http://archive.omaniaa.co/showthread.php?t=706882

يسعد مساكم / صباحكم
هلا بالجميع ...

بالبدايه احب استرعي عناية الاخوه والاخوات من طلبة وطالبات المدارس بأن ( من جد وجد ومن زرع حصد ) وبأنه ايضا ( لكل مجتهد نصيب ) لذا اتمنى ان يركزوا على مذاكرتهم وخاصة قبل الإمتحانات ..
خطأ كبير اعترف اني ارتكبته من خلال اعتمادي على الغير نظرا لعدم مذاكرتي ولم اعرف مداه إلا بعد فتره ( الحين عاد الكل بيقولوا الرايق كان يغش ههههه ) ...
ولأن قلمي لايجيد سوى النهج الكوميدي لذا يجدني البعض اميل له لأنني بصراحه لا اجيد التراجيديا ولا احبها ايضا ...
راح احكي لكم اليوم قصه صارت لي زمان وانا ادرس ..
كنت بالصف الثاني الثانوي وكانت فترة امتحانات نهائيه ..
يوم من الايام كان علينا امتحان فيزياء وعاد انا وهالماده وايد حبايب واتوقع كثير مثلي ههههه ...
قبل بداية الامتحان نسقت مع واحد من الربع وكان وايد شاطر فهالماده بأني لو توهجت راح اعمل له حركه وعليه يرسل لي اجابات الاسئله الدواهي اللي عليهن درجات كبار ههههه اما الصغار من نوعية صح وخطأ هذولا راح اخبص فيهم مش مشكله ...
وانا رايح الإمتحان كنت مجهز معاي برشامه ولا اروع هههههه وكنت كاتب الاجابات والقوانين بشكل صعب ينشاف لـأني كتبته بخط صغير جدا وشبكت الحروف مع بعضها كأنها طلاسم واستحاله حد يعرف يقرأ اللي كتبته ...
دخلنا الصف وحصلنا فيه اثنين من اعضاء اللجنه واحد عماني وواحد مصري ..
جلس كل طالب بكرسيه وبدأ توزيع اوراق الإمتحان ..
بديت اتصفح اوراق الامتحان اللي طبعا كانت اسئلته تفرح القلب وتبهج الخاطر هههههه .. وبكل هدوء طلعت الحرز والطلاسم اللي كنت مجهزنهم وانا عيني على المدرس المصري لأنه كان ينخاف منه اما العماني كان يلعب بعالم ثاني هههههه ...
مامداني اطلع الورقه إلا والمصري على راسي اشوفه وسحب الورقه واول ماطّل عليها صرخ وقال : ايه ده بس ..!!!؟ بتشوفها ازاي دي .. بتشوفها ازااااي ...!!!؟ يخرب عقلك ...
سحب الورقه وراح وانا من القهر بذبحه احس نفسي ههههه ...
الخطه الأولى فشلت وبقت الخطه الثانيه .. قمت اكح شوي إلا وصاحبي التفت لي وغمزت له بعيني وفهم قصدي ..
سوى اللي عليه ورمالي الورقه وطاحت تحت ريولي ...
المصري لمح الحركه وقال : اختشي ياواد .. ياواد اختشي .. لو شلتها من الارض حطلعك براا .. فاهم ولا لـأ ؟ .. وظل مركز نظره عليها ..
دارت الدنيا قدام عيني والاحظ الربع يطالعوني ونفسهم يعرفوا اشلون راح احل هالمشكله ...
قمت افكر بسرعه وانا اطالع الوقت وقلبي دقاته تزيد ..
فجأه لمعت ف ذهني خطه جهنميه .. مسكت ورقة الاسئله وشقيت منها شوي ورقه صغيره وقمت ألفها وارتبها بشكل مدوّر وحطيتها وسط اصابع ريولي والربع مستغربين والف سؤال وسؤال يخطر عليهم شو راح اسوي بالورقه وليش كذي اسوي .. الخ ..
نزلت ريولي بهدوء وظليت اقربها شوي شوي من البرشامه اللي رماها لي صاحبي ...
ولما شفت اصابع ريولي قربت وايد فتحتهم ونزلت الورقه اللي رتبتها جنب ورقة البرشامه وبسرعه مسكت بنفس الاصابع البرشامه ورفعت ريولي بكل هدوء ...
بكل براءه وهدوء اعصاب اخذت البرشامه وحطيتها تحت ورقة الاسئله وبنظره سريعه طالعت وجوه الربع اللي طبعا منصدمين من اللي سويته ههههههه ..
بسرعه نقلت الاجابات وصاحبنا المصري نايم فالعسل لأن عينه على الورقه اللي طبعا مكانها وانا استبدلتها ههههههه ..
سبحان الله مدري ليش وانا اراجع حل الاجابات بعد ماحليت كل الأسئله تقريبا تذكرت اغنيه لفيروز ...
ولأني احب فيروز قمت وبكل عفويه والله ادندن بأغنيه لها كنت وايد احبها .. شوي إلا واندمج واقوم اصفر باللحن هههههه ..
المدرس المصري جنّ .. ثواني واشوفه على راسي وهو يقول : وكمان بتصفّر ..!!؟ دي هزلت بقه ..!! ..
هو على باله انا اصفّر عشان الشباب يرموا لي برشامه بس انا والله كنت اصفّر بلحن الاغنيه ههههه ..

قلت له : استاذ والله كنت اصفر بلحن لفيروز ..
رفع حواجبه لفوق وقال : والنبي ..!!؟ انته حتعملهم عليّ ياواد ..!!؟ .. اطلع برااااا ...
سحب اوراقي وطلعت .. وانا اطلع اول واحد من الشباب اللي جالسين قدام همس لي وانا امر جنبه : لحن فيروز هاااا.. لحن فيروز ..!!!؟ علينا هالسوالف ههههه ..
طلعت من الصف وانتهى الموضوع عند هذا الحد بس كان يوم صعب بصراحه هههههه ...

اخوكم / رايق البال

[رايق البال]

قصه بقلمي / قال ما اخاف .. قال ..!؟
رابط القصه بالارشيف
http://archive.omaniaa.co/showthread.php?t=701810

يسعد صباحكم / مساكم
هلا بالجميع ...
نلتقي مرة اخرى وقصه صارت معي زمان والله وانا اكتبها اني ميت من الضحك لأني اتوقع الكل راح يقول الرايق راعي مشاكل هههههه ...
الله يسلمكم كنا زمان انا والشباب كل ليله نلتقي ندردش مع بعض في امور كثير ونصوغ احلام جميله ونحكي
احداث مرت بنا او سمعنا بها ...
كنا نلتقي كل ليله بعد صلاة العشا ونسولف مع بعض لحد الساعه 11 تقريبا وعقبها كل واحد بروح لبيته وينام ونلتقي الصباح فالباص واحنا رايحين المدرسه ..
احيانا تنقطع معانا الكهرباء بالمنطقه لمدة ساعه واحيان اقل واحيان اكثر لا واكثر انقطاعها بالليل او الظهر بعز الحر ههههه ... وسبحان الله لو انقطعت بالليل تحلو لنا السوالف عن الجن والعفاريت والمغايبه او المغصوبين كما يقول البعض في بعض مناطق السلطنه .. يعني كأننا ناقصين خوف هههههه ..
واحنا نسولف عن اللي ذكرتهم كان معانا واحد من الشباب واسمه عبدالله ..
هالشخص كان يكذب هالأمور ويقول انتوا تخوفوا انفسكم مالهم وجود اللي تحكوا عنهم ..
مرت الايام ومره انقطعت الكهرباء كالعاده بالليل واحنا في موقعنا نسولف وفجأه تغيّر مجرى الحديث ليكون فقط عن المغايبه / المغصوبين وعن الجن والعفاريت ليتناسب مع الحدث اللي صار هههههه ..
ولأني كنت ناوي على خطه جهنمبه استأذنت من الشباب قبل نص ساعه من نهاية سهرتنا وقلت لهم احس نفسي مرهق بروح انام ...
تحركت منهم بإتجاه البيت وبعدما ابتعدت عن مرمى نظرهم غيّرت اتجاهي وانتظرت صاحبنا عبدالله في مكان مظلم وجنب بيوت شبه مهجوره ومهدومه بعضها .. وبصراحه اعترف اني كنت خايف بس حبيت القنه درس عشان اشوف هالشجاعه اللي فيه هههههه ..
مرت ربع ساعه .. عقبها نص ساعه تقريبا إلا وصاحبنا اشوف خياله من بعيد لأن طريقه للبيت لازم يكون عند هالبيوت الخربه ..
وصل صاحبنا وكنت انتظره وراء احد البيوت بحيث اشوفه ومايشوفني ..
مسكت حصاه ورميته بها .. وقف وانا اطالعه وهو يلف راسه يمين ويسار وطبعا ماشاف احد ..
كمل مسيره بهدوء .. ورميته بالحصاه الثانيه .. وقف ثواني وفجأه بدأ يسرع بالخطو وانا قلت فخاطري .. عيل الحين دواه لأنه
طالما بدأ يسرع بخطواته معناها خاف ههههههه ...
مسكت اربع مدري خمس من الحصى ورميته بهن مره وحده وانا اضرب دريشة البيت بيدي بقوه عشان تحدث صوت مرعب ..
ماشفت إلا غبار رجله وهو يركض نقول عاصفه منطلقه ههههه ويصرخ .. واااي .. لحقوا علي .. مغيّب ( مغصوب ) وراااااي ... وبسرعه على باب بيتهم ودخل وقفله .. وانا ميت من الضحك ..
باليوم الثاني الصباح واحنا رايحين المدرسه كان وجهه اصفر وماله مزاج يسولف ..
الشباب سألوه وانا معهم : شو فيك عبدالله .. عسى ماشر ؟
عبدالله : اما سالفه صارت لي امس ياشباب ..
انا والشباب بصوت واحد : شو صار لاسمح الله ؟.. احكي لنا ..
عبدالله : الله يسلمكم امس من انتهت سهرتنا وكل واحد راح لبيته .. وانا رايح البيت إلا وهذيك الحصاه تجيني وعقبها حصاه غيرها .. وبالاخير عاد وااايد حصى رموني به اللي دايما تحكوا عنهم ..!!!
انا : يالله عاد عبد خف علينا .. مامعقول اللي تقوله ..!! اصلا انته احيدك ذيب ماتخاف ..
الشباب : صح والله عبوود . مامعقول اللي تقوله ..
عبدالله : والله العظيم هذا اللي صار لي ... وتووبه عاد اكذب هالسوالف بعد اللي صار لي امس .. والشيمه بلاش منها هالسوالف وخاصة بالليل .. عن نفسي صرت اتنافض من الخوف والله ...
وانتهى الحديث والكل مستغرب وهو يهز راسه وانا طبعا كل البراءه فيني ههههههههههه والى يومنا هذا والله
اني ماقلت له ولا قلت لأي واحد من الشله اللي كانت معي بأني انا اللي خوفته هذاك اليوم ..
اخوكم / رايق البال

[رايق البال]

قصيدة / صباح الشوق والاهات والذكرى
رابط القصيده

http://omaniaa.co/showthread.php?t=21217&highlight=

يسعد صباحكم / مساكم
هلا بالجميع ..
نص ع السريع للرايق من باب التواجد وأتمنى ينال رضاكم ...


صباح الشوق والآهات والذكرى
صباح الكّر لهمومي ومأساتي
صباح الفقد والاحلام والمسرى
صباح قلوب تتمنى انكساراتي
صباح الآه توقد بالحشا جمرا
يغّذيها دفا صوتك وهمساتي
صباح العز والتقدير يا كسرى
على إيوان خفّاقي ونبضاتي
صباح الحلم والآمال والصبرا
يغنولك حبيبي الأجمل الآتي
حبيب القلب دام بحالتي ادرى
عليك الله تلملم عثر خطواتي
متى تلفي وتجبر بالقلب كسرا
عقب فرقاك بي تاهت مساراتي
ليا من غبت كم يطرا وكم يطرا
ضجيج الشوق في قلبي ونظراتي
صباحي انت والاشواق بي كثرا
ومسائي انت يا أجمل مساءاتي


اخوكم / رايق البال

[رايق البال]

خاطره / الليله الاخيره
رابط النص

http://omaniaa.co/showthread.php?t=16351&highlight=

يسعد صباحكم / مساكم
هلا بالجميع ..
لقاء آخر يجمعنا مع قلمي وهلوسة تباغته أحيانا ..


تحاصرني مشاهد هذا المساء الغير عادي
وتتهاوى على مخيلة منهكه في تتابع مثير للدهشه وكأن اتفاق مسبق بينهما ..
يعصف بي الوجع دونما هواده ويتلبسني ...
ايتها الغائبه وراء سراب الامنيات
لا ادري لما كل مساءاتي مرتبطه بصخب حضورك الذي اعشقه
ربما لأنه لا مكان للعقل والمنطق عندما نلتقي ..
لذا دائما يجذبني الحنين اليك ..
في ليلتك الأخيره معي ...
كثفّتي جرعة ادماني بك
ليكون وجعي اكبر وحدث ذلك فعلا
بعد رحيلك المباغت ..
نعم اعترف بأنك كنتي اكثر من رائعه
في رسم سيناريو تلك النهايه المؤلمه ..
نتظاهر دائما بأننا اقوى ونكابر امام من حولنا ولكن عندما نخلو بأنفسنا
يجتاحنا الشوق من الزوايا الأربع وتحاصرنا الذكريات
ومابين سندان الأماني ومطرقة الإنتظار نعيش وضعا مأساويا
بكل ماتحمله هذه الكلمة من معنى ...
ولأنني رجل اعشق الصخب والجنون ولا أأبه
بكل ماهو منطقي وعقلاني رغم جراحاتي
وسقوطي مترنحا من على صهوة طموحاتي
إلا انني لازلت مستمرا في السير بكل ثبات عندما يتوقف الكثير
عند اول نكبه تصادفهم ..
لا اجيد فن مراجعة الحسابات الذي يتقنه البعض
ولا اتعظ بكل ماحدث لي فلا وجود للتراجع في قاموس حياتي مهما كانت النتائج ...
هكذا جبلت ياسيدتي ...
لذا تجدينني ..
رغم ضبابية الرؤيه والموقف ابحث وبدون كلل عن اي نور يأتي من البعيد وان كان خافتا
واحث الخطى اليه لأزرع في نفسي قناديل الفرح ..
هناك ..
حيث للأمل ومضه وللقاء حنين ستجدينني
انتظرك على طاولة بها وردة حمراء تتوسط شمعتين
لعلنا من جديد نلتقي بعد فراق طال امده ..

اخوكم / رايق البال
الاحد
2 / 11 / 2014
12:45 ص

[رايق البال]

قصيدة / ياناعم العود ياللي ملبسك زاهي
رابط القصيده
http://omaniaa.co/showthread.php?t=5548&highlight=


يسعد مساكم / صباحكم
هلا بالجميع ...
نص نشر لي هنا في 10 / 2013 وحاليا في أرشيف السبله
وعاودني الحنين له ..


ياناعم العود ياللّي ملبسك زاهي

يافتنة الصبّ ياحظه وتوافيقه

يامن ملكني وصار الآمر الناهي

ولاغاب عني شكيت الهم والضيقه

يفداك عمري ألا يالحالي الباهي

ياللي عشانك حلال(ن) دمّي إتريقه

بك كامل الزين وانته بالغلا راهي

يامن لشوفك يزيد القلب تشويقه

كل المزايين دونك يالغلا اشباه

اسطع بنورك لشوف(ن) زاد تحديقه

زاهي وزاهي ورب العرش بك زاهي

هذا الجمال الذي يتعب معاشيقه

يانسل الاشراف وابن العز والجاه

من هو مثيلك ؟ وانته للنحل ريقه

بعدك تعبني وعنك ماغدا ساهي

قلب(ن) تمناك من جملة مخاليقه

لا جنّ ليله شكى الحرمان والآه

واتصافق الشوق واهتزت معاليقه

تعبت اناديك وانته ساهي(ن) لاهي

ماهي عداله تزيد الروح تغريقه

تعال واسمع حديث الفاه للفاهي

يامن عطيتك خفوقي مع مواثيقه


وخذها حقيقه كلام (ن) قالته اشفاهي

واللي خلقني فراقك آه ما اطيقه

ياسكري انت واشواق الجوى شاهي

كلّي انتظار(ن) لوعد(ن) طال تحقيقه



اخوكم / رايق البال

[رايق البال]

هلا بالجميع ..
كل عام وانتم بألف خير ..
اعاد الله علينا وعليكم هذا العيد اعواما مديده ان شاء الله .
تمنياتي للجميع بعيد سعيد ومبارك يارب

[رايق البال]

مسّبع / زهيريات + ( نصن للرايق )
رابط الموضوع بالارشيف

http://archive.omaniaa.co/showthread.php?t=757514

يسعد صباحكم / مساكم
هلا بالجميع ...
من جديد نلتقي مع هذا الفن التراثي الجميل واللي سبق وقدمت عنه عدة نصوص كما هي واضحه بالرابط التالي :

http://omaniaa.co/showthread.php?t=698866&highlight=

وهالفن كما سبق واسلفت محليا تشتهر به المنطقه الشرقيه وتحديدا منطقة صور كما ايضا تشتهر به بعض مناطق الباطنه مثل السويق وصحم وصحار ... وهو فن معروف خليجيا وخاصه بالكويت والبحرين ويطلق عليه مسبع او زهيريات كما انه معروف بالامارات اما السعوديه وقطر فشهرته اقل مقارنة بالدول والمناطق اللي ذكرتها ... اما عربيا مثل مصر وعدة دول اخرى وخاصه الشام يعرف بإسم ( موال ) وهناك مسمى آخر له ببعض الدول العربيه ولكن للأسف لا اذكره حاليا .. وهذا يعني ان الدول العربيه تلتقي في العديد من الفنون والتراثيات وان اختلفت الاسماء فكلنا عرب وتاريخنا واحد وحضارتنا وتراثنا كذلك .. هالفن من شروطه انه فقط يتكون من 7 ابيات او مقاطع وتكون الثلاثه الابيات الاولى على قافيه واحده وبنفس الكلمه ولكن لكل كلمه معنى مختلف .. اما الابيات او المقاطع الثلاثه اللي بعدها فتكون على قافيه مختلفه ولكن تحمل نفس الكلمه وايضا لكل كلمه معنى مختلف اما قافية البيت او المقطع السابع فتعود لقافية الابيات او المقاطع الثلاثه الاولى وهو مايعرف بالتلاعب اللفظي للكلمه يعني للكلمه معاني عديده رغم انها تحمل نفس الحروف ..
راح اقدم حاليا نصين مع شرح لقافية البيت او المقطع والتي توضح التلاعب اللفظي بها ..

النص الأول :


ياناعم الصوت وبالخدين حبّة خال ( حبة الخال )
ياكل اهلي واجدادي وعّم وخال ( آخ الأم )
شوقي ذبحني وانته الشوق منه خال ( غير مشتاق )
مامال قلبه وربّي رايقك مامال ( لم يميل لغيرك)
وكيف عنك يميّل وانته كنز ومال ( الثروه الكبيره )
ولا جنّ ليله تغنّى بالسهر يامال ( لحن غنائي معروف )
وانته كما انته مريح (ن) مهتنيّ وخال ( غير مشتاق )


النص الثاني :

تكفى اتصل بي ولو بس فالشهر مّره ( مره وحده )
واذكر وليف(ن) شرابه الحنظل ومّره ( الشراب المرّ )
ودرب(ن) جمعكم خفوقه يتبعه ومّره ( يمشي فيه )
علّ وعسى يلتقيبك ياكحيل العين ( العين فيها كحل )
ياللي مكانك تعلّى في ربوع العين ( مدينة العين بدولة الامارات العربيه المتحده )
فديت اسم(ن) بدا بأول حروفه العين ( حرف من حروف اللغه العربيه)
وراح ونساني ولا فكر يجي مرّه ( مره وحده )

اتمنى ان اكون وفقت في الشرح وماقدمته من نصوص كما انوّه بأن حرف العين ومدينة العين جاء ذكرهما لكون البيت يتطلب ذلك .. يعني بإختصار بلاش منها التوقعات اللي بالي بالك لاتورطونا بعد هههه ..

اخوكم / رايق البال

[رايق البال]

اخر ماكتبت
قصه بقلمي / اووه الحاج قوم صلي
رابط القصه

http://omaniaa.co/showthread.php?t=8...75#post1905575

يسعد مساكم / صباحكم
هلا بالجميع ..
عوده جديده لقلمي وقصه واقعيه حصلت زمان ..

كان احد الاشخاص يعمل في احدى الجهات العسكريه زمان بوظيفة جندي مثل كثير من الشباب العماني ..
هالشخص كان وايد يتغيب عن عمله وملفه كله محاضر تحقيق وخصميات من الراتب وفوق هذا كان - الله يهديه - خمار زمار ( الله يعزكم ) ولا صلاه ولا عباده ههههه ..
الكل كان عارف اخلاقياته واسلوبه وياما نصحوه ولكن لا حياة لمن تنادي ..
لحد يوم من الايام فجأه هالجندي راح لمكتب الضابط المسؤول عنه وقدم طلب اجازة حج ..!
الضابط لما شاف طلبه انصدم لانه عارف اخلاقياته وحياته كيف عايش والشباب ربعه بعد انصدموا وكل واحد فيهم يردد .. معقوله فلان يروح الحج ؟ هذا صلاه مايصليها اشلون يحج عاد ههههه بس بالاخير الضابط وافق رغم انه مو مقتنع داخليا بس قال سبحان الله يمكن الله هداه وناوي يتوب ..
عطوه اجازه حج وطلع اجازته وهو فرحان ..
مرت الايام وانتهت اجازة الحج وداوم هالمره بدون تأخير ..
لما داوم كان حالق شعر راسه ع الاخر ومربي لحيه ومسباح ف ايده وكل شوي يهلل ويكبر ويستغفر ..
اعطى لكل واحد من ربعه مسباح ومصحف ومن ضمنهم الضابط المسؤول عنه ..
بعد اننهاء الدوام نام مع ربعه بالسكن كالعاده والكل منصدم ويهز راسه ويقول معقوله فلان تغير لهالدرجه . ! سبحان الله ..
ناموا ولما قرب اذان الفجر انتظروا ربعه صاحبهم الحاج يقوم ويصلي بهم بس الحاج ولا على باله وشخيره من مسافة كيلو ينسمع ههههههه وربعه يصحوه .. اووه الحاج قوم صلي بنا او على الاقل صلي والحاج ابد ولا على باله وفسابع نومه ..
ربعه قالوا يمكن تعبان من السفر بنخليه اليوم يرتاح واكيد بكره من يسترد نشاطه الوضع راح يكون غير ..
اليوم الثاني تكرر نفس الشي الحاج الصلاه مايمر صوبها ابد هههههه ربعه خلوه وماهان عليهم يخبروا الضابط عنه ..
مرت الايام لحد ليله من الليالي كان هذاك الضابط سهران في البار ( والعياذ بالله ) الا شوي ويشوف صاحبنا داخل وطلب شراب ..
الضابط انصدم بس سكت وخلى نفسه كأنه ماشايفنه ..
صاحبنا شرب وارتاح ورجع السكن ونام ولا كأنه صاير شي ..
اليوم الثاني الضابط طلبه بمكتبه واول ماوصل سأله ..
الضابط : هلا فلان .. كيفك؟
صاحبنا : الحمد لله سيدي بالف خير
الضابط : الحمد لله .. ماشاء الله وايد تغيرت تصدق من رحت الحج . ! صلاه وعباده وهدوء الله يزيدك من فضله ..
صاحبنا : الحمد لله سيدي .. الواحد ترا لازم شوي يحاسب عمره ويعقل والطيش مب دايم عاد الواحد يستمر فيه ..
الضابط : عندك حق والله .. ماشاء الله عليك يافلان حكم تقول نعم حكم .. امس الساعه 9 بالليل وين كنت ؟
صاحبنا وهو مرتبك : انا ..!؟ بالسكن اسولف مع الشباب .. لالا طلعت اتمشى شوي .. لا تذكرت صح كنت نايم بعدما صليت العشا ..
الضابط : ماشاء الله الف اجابه اشوفك قلت ..! .. عيل من اللي بالبار كان الساعه 9 ؟
هنا صاحبنا اصفر لونه وتلعثم ودار راسه وماعرف يرد ..
الضابط وبكل حزم : روح جيب لي جواز سفرك الحين ؟
صاحبنا : الحين ؟ ليش سيدي ؟
الضابط وهو معصب : ايوا الحين وبدون ماتناقشني بعد .. رايح الحج هاا رايح الحج ..!
راح صاحبنا وجاب جوازه واعطاه الضابط ..
مسك الضابط الجواز وقام يقلب اوراقه الا ويشوف الختم عليه من تاريخ بدء اجازة هالجندي ( مسقط / تايلند / مسقط ) هههههههه ..
خلى الجواز على مكتبه ونظر لصاحبنا وصرخ فيه وهو معصب وقال : تايلند هاا..! تايلند..!؟ اشوف الكعبه هناك صارت .. ! تقص علينا ونصدقك على بالنا الله هداك وبالاخير يتضح انك رايح تايلند يامفتري ..! سجن شهرين وانهاء خدمه ..
صاحبنا : والله سيدي سامحني الشيطان ضحك علي واوعدك ما اكررها ..
الضابط : الشيطان قص عليك هاا ؟ خليه ينفعك الحين ..
وظل يحاول صاحبنا مع الضابط بس الضابط طنشته وبالفعل تم سجنه شهرين وانهيت خدماته ..
انتهى ..
بقلمي ..
اخوكم / رايق البال

[رايق البال]

للذكرى ..

رايق البال

الإدارة العليا للسبلة العمانية
رئيس طاقم الإدارة العليا ورئيـس المرشحـين والرئيس المباشر لسبلة رواق الشعر والخواطر والقصص والشيلات

تاريخ التسجيل Aug 2010
الدولة فهالدنيا
الجنس
المشاركات54,277