( ... ❤ كان لي عندك حكايه ❤ ... )

[رايق البال]

قصيدة :
ياساهر الليل تنطر جيّة الغايب
ريّح خفوقك وشيل الضايقه عنه

نشرت هنا في:
17/8/2010
الساعه : 9:48
رابط القصيده بالارشيف :

http://archive.omaniaa.co/showthread...1076&highlight=

يسعد مساكم / صباحكم

شخبطه متواضعه لقلمي اتمنى تعجبكم ..

ياساهر الليل ترقب جيّة الغايب

ريّح خفوقك وشيل الضايقه عنّه

ياساهر الليل لايهمك ابد نايب

وخليك صابر بدرب(ن) انت ماشنه

لا تستمع فيه قول الحاسد العايب

واحفظ عهودك مع التشريع والسّنه

دامه يحبك .. اكيد لشوفتك ذايب

وشي(ن) مؤكد بعادك دوم شاقّنه

لوطال بعده لزوم لديرته آيب

ولو طال همّك اكيد السعد تالنه

وان دق بابك وجالك يعتذر تايب

واقسم ودادك محال يكون ناسنه

راعي ظروفه وقدّر صيحة الثايب

داري خفوق(ن) تترجم لوعته أنّه

يكفيه شوقه .. عذابه .. حظه الخايب

ياساهر الليل لاتخيّب ابد ظنه


اخوكم / رايق البال

[رايق البال]

قصيدة :
تعال خلّك من حكيهم وهنّي
قلب(ن) على فرقاك كم صاح وينك؟
نشرت هنا في :
19/8/2010
الساعه : 7:28
رابط القصيده بالارشيف :

http://archive.omaniaa.co/showthread...1733&highlight=



يسعد مساكم / صباحكم

تجاوبا مع طلب شخصيه لها تقديرها اعود من جديد متمنيا ان
ينال بووووح قلبي وقلمي المتواضع رضاكم ....

تعااااال خلّك من حكيهم وهنّي

قلب(ن) على فرقاك كم صااااح وينك؟

تعاااال طف اشواق ياما اذبحنّي

في غيبتك واروي ضماااي بحنينك

واعزف على اوتار قلبي وغنّي

كلّي انتظااار وشووق طلّة جبينك

اهواك يامن في هوااااه امتحنّي

ربي وكساك اخلاااق تكمل بزينك

انته منايه وانت عنّي ومنّي

وانت الامل لاضاق خاااااافق ظنينك

ماقد حصل في يوم بك خاب ظنّي

في روضة العشاق منهو قرينك

يفداك كلّي يااقرب الناس منّي

واللي بقى (م) الكل فدوه لعينك


اخوكم / رايق البال

[رايق البال]

قصيدة :
شريط الذكريات
نشرت هنا في :
29/ 8/2010
الساعه : 12:53
رابط القصيده بالارشيف :

http://archive.omaniaa.co/showthread...4807&highlight=

يسعد صباحكم / مساكم

لكل من اعجبته محاولاتي المتواضعه اقدم بوووح قلمي .....


ومع ذاته وقف لحظه .. وقف يسترجع الذكرى

شريط الذكريات يعييد مشاهد سالف اعوامه

شريط الذكريات يعييد له الذكرى مع الذكرى

وهو غااارق بأفكاره مع الماضي وايامه

وفجأه والشريط يدور لقى له وقفة(ن) حيرى

بمشهد كان به ياما سبح في عالم احلامه

عجيب(ن) ذلك المشهد قلب من صحوته سكرى

وشتّت له موازينه واشعل نااااار ضراّمه

تحرّك به عظيم الشوق وحنّت مهجة(ن) حرّا

وهاجت ثورة الماضي وزاد الجرح إيلامه

وقف يستجمع القوّه وتمتم يانفس صبرا

عسى دنيا عبوس اليوم تحّن تعود بسّامه

وقفّى والامل عنده غصون(ن) مورقه خضرا

من الخناس يتعوّذ وشر عيووون لواّمه

لك الله ساري(ن) ليلك بدرب(ن) موحشه قفرا

عسى الخلاّق بك يلطف ويسبغ فيض إنعامه



اخوكم / رايق البال

[رايق البال]

قصيدة :
خلها على الله
نشرت هنا في :
7/9/2010
الساعه : 8:23
رابط القصيده بالارشيف :

http://archive.omaniaa.co/showthread...8231&highlight=

يسعد مساكم / صباحكم

تجاوبا لطلب اخوي وصلني من شخصيه لها كثير تقدير عندي ومقدرت

ارد كلمتها اعود من جديد .. كما ارجو قبول اعتذاري الشديد من كل

الأخوه والأخوات اللي زينت تعليقاتهم الرائعه ومشاعرهم الأروع

قصيدتي السابقه (الى .......) ولم يتسنى لي الرد عليهم لأسباب

ماله داعي اوضحها ....

من جديد نلتقي ومن جديد اتمنى مايخطه قلمي المتواضع ينال

رضاكم ايها الأحبه ....

ياهيييه ياللّي حرّك اشجان واشجان

بوووحك وصلني وصرّختك ارّقتني

همّك كساني والذي كان قد كان

وسيووول حزنك صاحبي غرّقتني

البستني جلباب فخر(ن) وتيجان

وعزفك شجاااني يالوليف وذبحني

وقلب(ن) ضناااني دايم الدوم هيمان

حرّك مسيره صووب دار(ن) دعتني

ياللّي عليك من الغلا الف نيشان

وحشمه وعزّه ومقدره اذهلتني

سبحانه اللّي كمّل الريم سبحان

وارسى دعايم من وصوفه سبتني

ياما غرست الحب مثلك ولا زان

بعيون ناس(ن) بالتجافي رمتني

وياما عشت آهاات وآلام واحزان

ودنياي يامااااا باللّواهب كوووتني

وقصر(ن) بنيته هّد ساسه والأركان

اسلوب ناس(ن) في هواها شقتني

وياما شريت الود بعمري والاثمان

وبين الرجا واليأس عيني افضحتني

ورغم الذي سويت ما شفت انسان

وقّف(ب) صفّي يوم روووحي نعتني

كل(ن) يغني منتشي دوم نشوان

وانا اغني من جرووووح(ن) هوتني

خلها على الله خالق الإنس والجان

ياللّي حروفك والله والله اسعدتني


اخوكم / رايق البال

[رايق البال]

هلا بالجميع ..
قلت اغير شوي هالمره وادرج هنا بعض من قصصي وخواطري اللي نزلت بهالنسخه اولا عشان التغيير وثانيا عشان تعب بصراحه اروح الارشيف واقوم اسحبهن من هناك ههههه ..
عشان كذي راح انزل شوي من اللي نزلن بهالنسخه وشوي من اللي بالارشيف ..
طابت لياليكم ...

[رايق البال]

قصة :
الوحش
رابط القصه :

http://omaniaa.co/showthread.php?t=27519&highlight=

يسعد مساكم / صباحكم
هلا بالجميع ..

عوده اخرى لقلمي وطرح يغلب عليه الطابع الكوميدي من خلال القصص اللي اطرحها بين فتره والثانيه عن بعض الاحداث اللي عايشتها ..


الله يسلمكم زمان وانا بالصف السادس الابتدائي كان معنا طالب ماشاء الله
عليه طويل وضخم لكونه اكبر مننا فالسن لدرجة ان الطلاب ينادونه بالوحش ..
هالطالب كان اسمه احمد وكثير كان مشاغب ويضرب الطلاب وطبعا احنا اصغر منه لكونه كان راسب سنتين في صفه وانتقل معنا ..
كنت الوحيد اللي دايم هو مركز عليه مايمر يوم مايضربني فيه ههههههه وكلما شافني لازم فجأه يجيني بوكس منه او شوته انا وحظي عاد لدرجة ان بقية الطلاب كانوا يقولوا له .. حرام عليك ليش تضربه دايم ..!!
وكان يرد عليهم بكل ثقه .. مزاجي كذي .. بضربه يعني بضربه ..!
ربما كان لصغر سني وحجم جسمي سبب كبير في انه متسلط علي هههههه ..
يوم من الايام وكنا اذكر بالفسحه بس انا ماطلعت من الصف قلت اذاكر شوي لأن بالحصه الرابعه كان علينا امتحان وبالصف معي حدود 4 طلاب نفس الشي كانوا يذاكروا ..
فجأه دخل صاحبنا واول ماشافني قام يركض وراي بالصف يبي يضربني وانا اركض عشان اشرد عنه لحد ماحاصرني ووقفت ووراي جدار الفصل وانا خايف منه والطلبه اللي بالصف يحاولوا فيه يخليني بحالي وهو مصّر يضربني ..
مسك بيده اليسار رقبتي وجهز إيده اليمين عشان يضربني بوكس بكل قوته ..
انا كنت في وضع صعب لأني مو قادر اهرب لأن ظهري ملاصق الجدار ولا قادر افك ايده من رقبتي ..
شوي وانا اطالعه يرفع ايده اليمين عشان يضربني بوكس بكامل قوته وانا عيني على قبضة ايده اللي اشوفها تقرب من وجهي بسررعه وافكر اشلون اتخلص من هالموقف لأن الضربه راح تكون قويه جدا واحتمال تجي بعيني او اسناني ومعناها خلاص على عيني او اسناني السلام عاد لو جت الضربه فيهم هههههه ..
وانا اشوف البوكس جاي بكل قوته وعلى بعد سنتيمترات مني مدري والله كيف صارت هالحركه مني فجأه بس اكيد الهام ورحمه من الله لي ..
نزلت بسرعه بكامل جسمي لتحت بثواني فقط قبل لاتوصلني ضربته ..
إلا واسمع قوة الضربه بالجدار طاااخ وصرخته بكل قوه وهو يتألم لأنه هو تفاجأ بالحركه ومامداه يتصرف خلاص سبق السيف العدل مثلما يقولوا هههههه ..
آآآآآآآه انكسرت ايدي واااي بمووت وقام يصيح والدموع ماليه وجهه من قوة الضربه والألم ..
طلع من الصف وهو يصيح وبنفس الوقت يهددني ماعليك .. خليني بس ارجع وايدي تخف ان ماوريتك شغلك ولا بتشوف .. والله بقتلك ... الخ من عبارات تفرح الخاطر وتسعد القلب الحزين هههههه وانا ساكت ما اتكلم ..
شوي وانتهت الفسحه وبدأ الاختبار ومن خلص الدوام قلت لواحد من الطلبه ساكن قريب بيتنا واسمه عبدالله ..
انا : بكره خلاص انا مابداوم عبادي اخاف هذا يذبحني لو جيت ..
عبدالله : لاتخاف منه اصلا اظن ماراح يجي لأنه وايد تعوّر بإيده ..
اليوم الثاني انا بصراحه مادوامت ووعلى المغرب رحت بيت زميلي وسألته ..
انا : هاا .. كيف داوم احمدوه الصياح ؟ هههههه
عبادي : الصياح عاد سمّيته الحين ههههههه .. لا ماداوم واليوم ابوه جانا المدرسه وقال للمدرس ان ولده احمد طاح وانكسرت ايده وسووا له جبس بالمستشفى واحتمال ماراح يداوم الا بالامتحانات النهائيه اللي راح تكون بعد شهر تقريبا ..
انا : ايوا الصياح ليش ماسمعته كيف يبّغ ويرغي يوم تعور بإيده هههههه ..! طاح هااا .. طاح ..!!؟ وبعد يكذب على ابوه عشان مايضربه ..! قال طاح قال مو كنّه كان يبي يضربني ويكسرني انا المسكين .. يستاهل اللي جاه ..
اليوم الثاني رحت المدرسه واحمد طبعا ماداوم وارتحنا من مشاغباته وعقبها اعطونا اجازه قبل الاختبارات النهائيه ..
بعد انتهاء الاجازه داومنا كلنا عشان نختبر وكنت طول الطريق خايف لأنه معناه احمد راح يداوم واكيد ناويلي على نيه ولا اجمل هههههه ..
دخلنا الصف إلا واشوف احمد ايده من الاصابع لحد الكوع مجبّسه ..
مريت جنبه وطبعا ماله داعي اوضح نظرات الشوق اللي شفتها بعيونه لما شافني ههههه ولا ذاك الهمس اللي اسمعه .. انكسرت ايدي بسببك .. خليهم بس يطلعوه من ايدي وشوف شو بسويلك .. ياويلك مني .. الخ من عبارات الواحد يرتاح نفسيا لما يسمعها اكيد هههههه ..
انتهت الاختبارات وعطونا موعد لإستلام الشهادات ..
لما حان يوم استلام الشهادات قلت لصاحبي عبدالله ..
انا : عبوود .. جيب شهادتي معاك بكره انا مابروح المدرسه ..
عبوود : ليش ..؟
انا : شو ليش بعد ..!؟ اخاف احمدوه ايده خفت وشالوا الجبس وعاد تعرفه انت اكيد بيكسرني من يشوفني ..
عبوود : صح والله عندك حق ههههه .. خلاص ولايهمك انا بجيبها لك ..
راح اليوم الثاني صاحبي واستلم شهادتي وشهادته وشافه احمد وعلى طول سأله لما شافه ..
احمد : وين صاحبك عيل ؟ اشوفه ماوصل للحين عشان يستلم شهادته ..!
عبدالله : راحوا البلد هو واهله خلاص وقال لي استلم شهادته عنه ..
احمد : اهاا .. راحوا البلد هاا..؟ زين زين .. مصيره يجي واشوفه ماعليه ..
رجع عبدالله من المدرسه واعطاني الشهاده وخبرني باللي حصل ..
انا : شفت كيف انه يدورني دواره ..! كان معي حق لما قلتلك انت استلمها عني الشهاده ولا كان خلاص متكسر جسمي الحين ..
عبدالله : صح والله ههههه .. انت لو شفت عيونه كيف يدور عليك كان الشرر يتطاير منهم نعم هههههه ..
ضحكت انا وقلت : شفت كيف ..!؟.. الحمد لله اني مارحت ههههه ..
انتهى .. بقلمي

اخوكم / رايق البال

[رايق البال]

قصيدة :
شقاني بعدك الدايم شقاني
نشرت هنا في :
9 / 9 /2010
الساعه 1:59

رابط القصيده بالارشيف :

http://archive.omaniaa.co/showthread...8662&highlight=

يسعد صباحكم / مساكم

آخر ما اكتبه ربما نظرا لظروف العيد وإنشغالاته بالطبع .. كل عام

وجميع الأحبه بكل خير ان شاء الله ..

شقاني بعدك الدايم شقاني

وضيّع حلم عمري والأماني

وشتّت مابقى لي من عزيمه

بها اخفي ضنا قلب(ن) يعاني

وعرّبد في خفى الوجدان شوقي

وزلّزل ماااااتبقى من كياني

وربّك هدّ حيلي انتظارك

وانت بدنيتك سالي وهاني

احاول اخفي اللوعه لعلّي

اخفف بالصبر شوق(ن) ضناني

وارقب لا دخل ليلي واظلم

عساني التقي طيفك عساني

واتّوله لصوتك لا تجلّى

ثقيل الهم لا صوبه دعااااني

ترانيمك لها ايقاع سحري

لها عندي مفااااهيم ومعاني

ولكنك بكل قسوه اتمادى

بتعذيبي ويحلى لك هواني

فلا همّك معاناتي ووجدي

ولا نار اشتيااااااقي يا اناني

وراح الليل والفرحه تلاشت

وضاعت فرحة العمر (ف) ثواني

فلا انته جيت والخافق تهنى

ولا صووووتك بعد غيبه لفاني


اخوكم / رايق البال

[رايق البال]

قصه :
انت حتعمل الشويتين دول عليّ ياواد ..؟
رابط القصه :

http://omaniaa.co/showthread.php?t=61219&highlight=

يسعد صباحكم / مساكم
هلا بالجميع ..

لقاء آخر يجمعنا ايها الاحبه وقصه بسيطه بقلمي اتمنى تنال استحسانكم ..
الله يسلمكم زمان وانا بالصف الخامس الابتدائي كان اصعب واكره ماده معي الرياضيات واتوقع الكل مثلي ههههه ..
والله من كثر ما اكتب عن مقالبي اتوقع الكل راح يفتكر الرايق راعي مشاكل ههههههه ..
كان يدرسنا هالماده استاذ مصري وكثير عصبي ويضرب بدون تفاهم عشان كذي ربما كرهت هالماده اكثر ..
معظم حصصه معنا بالصف كانت بالرابعه او الاخيره لذلك عشان اهرب من حصته جلست افكر شو اسوي ياربي .. شو اسوي؟
فجأه ..
جتني فكره جهنميه وطبقتها ..
بالمدرسه معنا مصلى للصلاه ومفتوح من جوانبه الاربع ..
بديت بتنفيذ فكرتي بعدما ترسخت بذهني على طول ..
انتظرت لحد رن جرس نهاية الحصه الثالثه وبسرعه طلعت قبل لا يدخل مدرس الرياضيات ورحت المصلى ..
وظليت على هالحال اطلع بسرعه بعد انتهاء الحصه الثالثه مباشرة لو كان هو معنا الحصه الرابعه وقبل الاخيره لو حصته الاخيره بصفنا ..
استمر هالوضع كل يوم لحد يوم من الايام الاستاذ افتقدني وسأل الطلاب ..
الاستاذ : امال الواد اللي بالكرسي الاخير فين؟ اصلي مشفتوش من مده هنا ..!
الطلاب : رايح يصلي استاذ ..
الاستاذ : بقه كده .. طيب
لما رجعت الصف بعد نهاية حصته خبروني الشباب ..
الشباب : ياويلك يا (فلان ) استاذ الرياضيات اليوم سأل عنك
انا : قولوا والله ؟ شو قلتوا له الله ياخذ ابليسكم ؟
الشباب : قلنا له انك رايح تصلي
انا : اهاا جزاكم الله خير بصراحه .. بس شو كانت ردة فعله لما كذي قلتوا له ؟
الشباب : سكت شوي وبعدين قال بقه كده .. طيّب
انا : اهاا .. الله يستر لأن كلامه مايطمّن خاصه لما قال طيّب ..
مرن كم يوم وانا على نفس الموال لحد يوم من الايام الاستاذ الظاهر نفذ صبره ..
سأل الطلبه مره ثانيه : لسه الواد ده بيصلي زي عوايده ؟
الطلاب : ايوا استاذ ..
الاستاذ : فين بقه قلتوا لي ؟
الطلاب : بمصلي المدرسه استاذ
الاستاذ : بقه كده .. طب حلوا المسأله دي لحد ما ارجع لكم تاني ..
الطلاب : تمام استاذ ..
طلع الاستاذ من الصف وانا اشوفه من المصلى متجه لي وطبعا هالزياره المفاجئه والسعيده انا انتظرها واتوقعها تصير بأي يوم هههههه ..
قلت فنفسي ياربي شو هالورطه ؟ الحين هذا شو جابه هنا وشو راح اقوله ..!؟
قرب الاستاذ مني وانا ولا كأني شايفنه وقمت اركع واسجد وادعي ساعه .. اصلي التراويح نعم مو الضحى او الظهر هههههه ..
وقف الاستاذ فتره ينتظرني اخلص وانا بالعكس يزيد ركوعي وسجودي ولا كأني حاس به وشايفنه ..
نفذ صبره اخيرا وقال لي بصوت عالي : لما تخلص صلاتك ياحاج ابقى تعال اوضة ( غرفة ) المدرسين منت طبعا مش حتخلص صلاه الا بعد ماتخلص حصتي انا عارف ..!
انا سكت طبعا وظليت على وضعي وهو راح ..
ياربي شو اسوي الحين؟ مضروب اليوم يعني مضروب ههههه .. بس الافضل اروح له غرفة المدرسين ع الاقل لو ظربني هناك ماراح يضربني وايد لأن المدرسين اللي بالغرفه راح يتدخلوا ويهدوّه اما بالصف بيتولاني ومحد بيقدر يقول له شي ..
بعدما رن الجرس وانتهت حصته وراح غرفة المدرسين رحت عنده ووقفت قدامه بكل هدوء ..
الاستاذ : خلصت صلاتك ياحاج؟
انا بكل براءه : ايوا استاذ والحمد لله ..
الاستاذ : الحمد لله .. إلا قول لي ياواد هو انته صلاتك والتهجد بتاعك مايجيش يعني الا بحصصي انا ...!
انا بكل براءه : شو يعني استاذ ؟ مافهمت قصدك
الاستاذ : والنبي ..! هو انت حتعملهم علي ياواد وعايز تأكلّني الاوانطه ولا ايه ..! كان غيرك اشطر يابابا ..
انا : استاذ انا كنت اصلي وانت شفتني بنفسك .. يعني ماهربت من المدرسه ..
الاستاذ : واللهّي ..!؟ طب آسفين ياسيدنا الشيخ اصلي افتكرتك بالغلط هربت ..!
انا : لا استاذ كله ولا الهروب من المدرسه ..
الاستاذ وصبره خلاص نفذ وعصبيته طلعت : شوف يااد متحاولش تعمل الشويتين دول بتوعك عليّ انت فاهم ؟ قسما عظما ان ماشفتكش من بكره حاضر بحصصي سواء الرابعه او الاخيره حوريك نجوم الليل فعز الظهر .. قال بصلي قال ..! علينا برضه الكلام ده ..! فاهم ياد ولا افهمك اكتر بالعصايه اللي شايفها قدامي دي ..؟
انا : فاهم استاذ حاضر ولايهمك ..
رجعت الصف وعاد الطلاب ينتظروني على احر من الجمر هههههه يبوا يعرفون شو كانت نهاية هاللقاء التاريخي بيني وبين مدرس الرياضيات ههههه ..
خبرتهم باللي صار كله وكلهم قالوا .. بصراحه معه حق .. انت عاد وايد مصختها حشى صلاتك ماتصير الا بحصصه هو بس ..! تستاهل اللي جاك ..
انا : استاهل هاا استاهل .. ماعليكم بسيطه ..
الشباب : ايوا تستاهل .. اشمعنى احنا كل يوم الضرب فينا يعني ؟
انا : كله منكم الله ياخذ ابليسكم حسدتوني على الراحه .. الحين عاد شو اللي بيفكّني منه .. ارتحتوا الحين ؟
الشباب : ايوا ارتحنا ههههه ..
من يومها واضبت على حضور حصصه وطبعا ماله داعي اوضح اثار هذاك الحضور على إيدي هههههه ..
الغريبه اني لما نجحت وانتقلت للصف للسادس اصبحت اشطر طالب بالصف بمادة الرياضيات تحديدا ولحد هاللحظه ما اعرف السبب والله بكل امانه هههههه ربما لأن المدرس تغير بواحد غيره مع انه نفس الشي مثله مصري ..! سبحان الله ..
انتهى ..
طابت لياليكم ...

بقلمي /
اخوكم / رايق البال

[رايق البال]

قصيدة :
سلام يامن تعلى بالقدر والشان
نشرت هنا في :
24 / 9 /2010
الساعه 10:59
رابط القصيده بالارشيف :

http://archive.omaniaa.co/showthread...2862&highlight=

يسعد مساكم / صباحكم

لأحدى الشخصيات الخليجيه كتبت هالقصيده كإهداء.. والإهداء

موصول لكل الأحبه اكيد واتمنى ينال رضاكم ماخطه قلمي

المتواضع ....

من ديرة المجد من دار المحبّه عمان

يممّت دار(ن) سكن فيها رشيق العود

دار الأصاااااله ومنبع آخر الاديان

دار(ن) حماها إلاهي من زمن وعقود

سلااام يامن تعلّى بالقدر والشان

سيد العذارى مليك الناعسات الخوود

سبحان من كملّك اصل وفصل سبحان

يابيرق الحب ياتاااااااج الوفا والجود

جيتك اسلّم وارضي الخاطر الزعلان

جيتك وحرفي له سطوة برق ورعود

جيتك وحرفي يهّل ابمدمعه هتاّن

ومن التحايا اقدم نرجس(ن) وورود

لاهان قدرك ياسيد المها لاهان

فوق الثريّا مقامك والجبال السووود

وختمت حرفي عساك بدنيتك نشوان

ويارب حسودك يموت بحسرته مكمود



اخوكم / رايق البال

[رايق البال]

قصه :
الجريمه الكامله
رابط القصه هنا

http://omaniaa.co/showthread.php?t=50463&highlight=

يسعد مساكم / صباحكم
هلا بالجميع ...

كثير نسمع بأنه لاتوجد جريمه كامله وان لابد من وجود خطأ ما يحدث وتظهر الحقيقه ورغم إيماننا بذلك إلا ان الحياه اثبتت بأن آلاف الجرائم تحدث يوميا ولم يتم التوصل للجناه لأسباب عديده ...
اليوم راح احكي لكم قصه وهالقصه حصلت في دوله عربيه عام 1930 حسبما اتذكر ...

الله يسلمكم مره بنت ومعاها 3 رجال شكلوا تنظيم عصابي وعملوا العجب في السرقات الكبيره ..
اتفقوا ان البنت تنتحل شخصية اميره ذات غنى وجمال وشخصبه استقراطيه والرجال الثلاثه اللي معاها واحد سائق والإثنين حراس شخصيين لها ...
وخطتهم بدأت بإستئجار سياره فارهه وبعدين تركب فيها الاميره ومعها الحارسين الشخصيين والسائق ويروحوا لأكبر محل ذهب ومجوهرات ..
ينزل الحراس الشخصين ويدخلوا على صاحب المحل ويقولوا له : سمو الاميره راح تدخل محلك الحين تختار مجوهرات وذهب لها ..
طبعا صاحب المحل يفرح كثير لأن اللي راح تشتري اميره مو انسانه عاديه وطبعا راح يكسب الآلاف من هالشراء ..
يفتح السائق لها باب السياره وتنزل بكل كبرياء وشموخ والحراسين الشخصين محيطين بها والسائق بسرعه يركض للمحل يفتح لها الباب وطبعا كل هذا يحدث امام عين صاحب المحل اللي يزيد انبهاره ههههه ..
وبسرعه يقربوا لها افخم كرسي وتجلس عليه وصاحب المحل يختار اثمن واجمل ماعنده من ذهب ومجوهرات ويجيبهم للأميره عشان تختار اللي تبيه ..
تختار الاميره طبعا الكثير مما غلى وزنه وسهل حمله وتقوم من كرسيها وتكتب لصاحب المحل شيك بالمبلغ لا وتزيد فيه شوي اكراما له هههههه . وبسرعه اللي معاها يفتحون لها الباب وصاحب المحل يودعها لحد باب السياره وهو فرحان من هالمكسب الرهيب اللي فجأه حصل عليه ..
ولما يروح اليوم الثاني يصرف الشيك يطلع انه بدون رصيد وعاد هو وحظه تحمل الصدمه ولا مات هههههه ..
استمرت هالعصابه على هالأسلوب سرقوا محلات كثير وكانوا يغيروا اماكن سكنهم بالفنادق وبعد بأماكن السرقات وكل يوم بمنطقه من البلد ... بدأت الصحافه تكتب والشكاوي تنهال على الشرطه وهي تحاول تحاصر هذا الأمر وتمسكهم لأن الذهب والمجوهرات المسروق بالملايين كان ..
اخيرا اجتمعت العصابه واتفقوا على القيام بأخر واكبر سرقه لأن الوضع خلاص صار خطير ...
تنكّر واحد منهم بلياس الشرطه وراح لأكبر محل مجوهرات ودخل وسلم على صاحب المحل وقال له : معك الضابط فلان .. طبعا سمعت انت عن عصابة الأميره اللي للأسف الشديد نهبت الكثير من المحلات ولم يتم التوصل لها ..
رد صاحب المحل : ايوا سمعت هالسالفه اصلا عامله بلبله في البلد والكل خايف منها ويتكلم ..
رد الضابط صاحبنا : اهااا .. عليك نور ماشاء الله عليك اسميك طلعت ذيب نعم وراح تسهل مهمتي وايد انته ..
صاحب المحل استغرب وسأله : اشلون يعني .. مافهمت قصدك ؟ وضّح لي اكثر ..
هنا عاد صاحبنا رسم الجديه على وجهه واخذه على جنب وهو يهمس له وقال : عندنا معلومات مؤكده ان هالاميره هي وعصابتها راح تجيك بكره الساعه كذا .. وطبعا انت سمعت عن اسلوبها انها تختار اغلى واثمن المجوهرات .. الخ ..
رد صاحب المحل : ايوا سمعت عن هالموضوع ..
هنا قال له صاحبنا : اهاا .. الحين عاد بقولك شو تسوي .. لما تجيك هالاميره خلي نفسك ماعندك خبر بأي شي واعطيها اللي تبيه .. احنا متابعين للموقف تطمن ولعلمك هي وعصابتها ساكنه فندق كذا .. والحين بروح عنك بس ارجوك خليك ملتزم بالخطه لاتخرب علينا خطتنا واحنا من نمسكها تعال لي المركز الفلاني عشان تستلم مجوهراتك وذهبك وراح نعطيك جائزه نتيجة تعاونك هذا مع رجال الأمن وراح تشتهر والصحافه تكتب عن بطولتك ههههههه ..
فرح صاحب المحل وتطمن ان اخيرا راح يمسكون هالعصابه وكمان راح يشتهر ..
في اليوم الموعود جت العصابه بس هالمره صاحبنا الضابط ماكان عندهم .. اختارت الاميره زي العاده اللي تبيه وبعدها قالت لصاحب المحل : انا مقيمه في فندق كذا ياريت تجيني هناك بعد ساعه ومعاك مجموعه اخرى عشان اختار بشكل افضل لأني شوي مستعجله حاليا وعاد لما تجي بعطيك المبلغ اللي تبيه وفوقه مبلغ هديه مني .. صاحب المحل قال لها : حاضر سمو الاميره ولايهمك راح اكون عندك بالموعد اللي ذكرتيه ..
طلعت الاميره وصاحب المحل يودعها بكل احترام وهو متطمن خاصة وان سكنها طلع نفس اللي قال عليه صاحبنا الضابط ..
وصل صاحب المحل فنفس الموعد للفندق وشاف الضابط يتمشى بالحديقه وابتسم كل منهما للثاني ...
طلع للأميره جناحها واعطاها المجموعه الجديده من اللي جابهم .. اختارت الاميره كل اللي جابهم وقالت له : الحين بكتب لك شيك بالمبلغ وفوقه مبلغ بسيط هديه لك مني .. ولحد ما اجهز لك الشيك اشرب هالعصير وارتاح ..شرب صاحبنا العصير وراح ف سابع نومه ههههه .. شوي إلا والضابط صاحبنا داخل الفندق ويقول لمدير الفندق : بسرعه قول لي الاميره ساكنه بأي جناح ؟ رد مدير الفندق : خير شو حاصل ؟
رد الضابط : بعدين بتعرف نايمين فالعسل انتوا ماعندكم خبر بشي مو كأنكم بالبلد عايشين ..!!
طلع بسرعه هالضابط للجناح وفجأه نزل ومعاه الاميره ومعها السائق وحارسها الشخصي مقيدين وهو يكفخهم ويقول لهم قدام كل المتواجدين ومن ضمنهم مدير الفندق : ع بالكم راح تظلوا دوم تنصبون ع الناس هاااه ؟ ماعليكم انا بوريكم شغلكم .. اعدام فيكم ماراح يكفيني ... وفجأه التفت لمدير الفندق وقال له : جهز فواتيرك وتعال لي المركز الفلاني بعد 3 ساعات لأن تعرف راح اكون مشغول بالتحقيق معاهم وتجهيز الأدله ...
تطمّن مدير الفندق وقام هو وكل المتواجدين بالفندق يشجعوه ويقولوا له : اسميك ذيب نعم .. صلبهم .. الخ .. ( والله اللي يسمع هالكلام راح يفتكر الرايق معهم ذيك الساعه هههههه ) ..
طلع الضابط وقدامه العصابه وركبوا السياره وتحركوا ...
وهم بالطريق فك قيودهم وغيروا ملابسهم وعلى طول للمطار لأن باقي على اقلاع الطائره يادوب ساعه لأن التذاكر خلاص كانت جاهزه والحجز من يومين كانوا مرتبينه هههههه .. خلصوا اجراءات السفر بسرعه واقلعت الطائره ..
بعد اقلاع الطائره بساعه صحى صاحب محل المجوهرات من نومه والتفت حوله ولما ماشاف احد قام يصرخ ونزل بسرعه وهو يصرخ : وينهم ؟ راحت مجوهراتي سرقتهم الاميره واللي معاها .. الخ تلّقاه مدير الفندق وابتسم له يهدّيه وقال له : خلاص تطمن مسكوها العصابه وبعد شوي بروح المركز عند الضابط فلان استلم فلوسي بس شوي اخلص حساب الفواتير وبنفس الوقت اعطيه مجال للتحقيق لأنه قال لي تعال بعد 3 ساعات ..
فرح صاحب محل المجوهرات وتطمن وقال له : اعرفه هالضابط والله انه نشمي ونفس الشي قال لي اجيه المركز عشان استلم مجوهراتي ..
رد مدير الفندق : خلاص عيل بنروح مع بعض ..
شوي وتحركوا وراحوا للمركز اللي قال لهم عليه صاحبنا الضابط ..
دخلوا المركز وهم فرحانين وشافوا احد الضباط جالس بالإستعلامات .. سلموا
عليه وقالوا : لو سمحت نبي الضابط فلان ..
الضابط استغرب من هالإسم وقال لهم : هالإسم مامر علي وماعندنا ضابط بهذا الإسم ..!!
مدير الفندق وصاحب محل المجوهرات ردوا بنفس اللحظه : اشلون ماعندكم هالضابط البطل واحنا من شوي شايفينه ومسك الاميره وبهذلها هي والعصابه وقال لنا نجيه هنا عشان ناخذ حقنا وهي تترحل للسجن بعد التحقيق ..!
الضابط أكد لهم بـأن هالإسم مو موجود معهم وقال لهم : اصلا احنا خلاص على وشك نمسكهم وحتى صورهم معانا .. لحظات بس بوريكم صورهم ..اول ماشافوا الصور إلا وصاحبنا الضابط كان من ضمنهم هههههه ..
هنا عاد بصراحه ما اذكر شو اللي حصل لهم من الصدمه ماتوا ولا جتهم جلطه ولا شو بالضبط هههههه ..!!!
انتهى ... بقلمي

اخوكم / رايق البال

ملاحظه : نشرت هنا لي في 7 / 7 / 2013