يالادمي نصيحتي لك بمجان
خذ المفيد وخاوي الب كبه
فرايدً مابين لؤلؤ ومرجان
مثل الذهب يوم المعامل تصبه
صديقك اليا من وجه الزمن شان
حزام ظهرك بالشدايد تنبه
ادمح له الزله ولو كان غلطان
لو الخطاء ياتيك من دون سبه
امسك غضب نفسك ولو كان ماكان
وتعوذ من بليس وبليس هبه
لاتكبر الموضوع وتشب نيران
وتصنع لك من صغيّر الحب قبه
ولا تنصحه لاصار بالذات زعلان
وقت الزعل حاول تصد وتكبه
نصيحتك وقت الزعل مالها شان
بعض النصائح يعتبرها مسبه
واليارضى قدم له النصح برهان
وقدم على نصحك دليل المحبه
وضرب له الأمثال بفلان وفلان
ولا تنهره بالقول وحذر تسبه
ولاتبين عيوبه ترى العيب لابان
ناره تزيد وتحرق النار حبه