يسعد صباحكم / مساكم
هلا بالجميع ..
ومن جديد نلتقي واتمنى ماراق لي يروق لكم احبتي ...


ضمير الوقت نايم يارفيقي والقلوب أرهاف
. . . . وسواليف الرحيل تشدّني والليل يغويني

وأنا ليلي قصايد يارفيقي ماعليه خلاف
. . . . حكايا والحكايا ودّها في صمت تغريني

سبح وجه الورق في داخلي وأفكاري المجداف
. . . . سيول الهم ّمالت في بحر حزني تخاويني

أغني للشقا وأنشد ترانيمي وأرد القاف
. . . . وتحدر دمعتي وأجرّ عبراتي وأخليني

تذكرت الفراق وفزّ ضيقي والضلوع ضعاف
. . . وأنا مالي على حد الهوى قلب (ن) يواسيني

حزين وضايق(ن) صدر الحزين ودمعته تنشاف
. . . . تفرد هالحزن ياصاحبي وأثقل موازيني

تمرد في طريقي ليتني جنبت عنه وراف
. . . . يبرد حرته في وسط قلبي والعنا فيني

تخيل هالصباح إليا عبس في ضحكتي وأنعاف
. . . . تخيل كيف يكسر خاطري ويرد ينفيني

تخيل هالشعور اللي نما ياصاحبي ما خاف
. . . . تخيل هالوطن من كثر ما أحبه يبكيني

طريد(ن) ماشكيتك يا وطن لو بعتني بأجحاف
. . . . أبصبر وأتحمل لو غزير الدمع يشقيني

أنا نصفي تعب والنصف الأخر للهموم لحاف
. . . أنا وجهي ذبول(ن) ماعرف طعم الفرح فيني

أنا باب(ن) خلعه الريح ليلة والعروق خفاف
. . . . وحيد(ن) مالقيت اللي يرد الضيم عن عيني

أنا اللي ماعرف يلقى لـ قلبه فلسفة وأوصاف
. . . أنا اللي ضايع(ن) بين الطموح وخيبة سنيني

تعال ورّد هالعالم لقلبي وأعطني الأنصاف
. . . . تعال وردّني يمّ الطريق ولا تخليني

رفيقي يا رفيقي أشتكي لك والسنين عجاف
. .. أبي لا ضاقت ضلوعي ألم قلب(ن) يهديني

اخوكم / رايق البال