( ... ❤ كان لي عندك حكايه ❤ ... )

[رايق البال]

قصه :
انت حتعمل الشويتين دول عليّ ياواد ..؟
رابط القصه :

http://omaniaa.co/showthread.php?t=61219&highlight=

يسعد صباحكم / مساكم
هلا بالجميع ..

لقاء آخر يجمعنا ايها الاحبه وقصه بسيطه بقلمي اتمنى تنال استحسانكم ..
الله يسلمكم زمان وانا بالصف الخامس الابتدائي كان اصعب واكره ماده معي الرياضيات واتوقع الكل مثلي ههههه ..
والله من كثر ما اكتب عن مقالبي اتوقع الكل راح يفتكر الرايق راعي مشاكل ههههههه ..
كان يدرسنا هالماده استاذ مصري وكثير عصبي ويضرب بدون تفاهم عشان كذي ربما كرهت هالماده اكثر ..
معظم حصصه معنا بالصف كانت بالرابعه او الاخيره لذلك عشان اهرب من حصته جلست افكر شو اسوي ياربي .. شو اسوي؟
فجأه ..
جتني فكره جهنميه وطبقتها ..
بالمدرسه معنا مصلى للصلاه ومفتوح من جوانبه الاربع ..
بديت بتنفيذ فكرتي بعدما ترسخت بذهني على طول ..
انتظرت لحد رن جرس نهاية الحصه الثالثه وبسرعه طلعت قبل لا يدخل مدرس الرياضيات ورحت المصلى ..
وظليت على هالحال اطلع بسرعه بعد انتهاء الحصه الثالثه مباشرة لو كان هو معنا الحصه الرابعه وقبل الاخيره لو حصته الاخيره بصفنا ..
استمر هالوضع كل يوم لحد يوم من الايام الاستاذ افتقدني وسأل الطلاب ..
الاستاذ : امال الواد اللي بالكرسي الاخير فين؟ اصلي مشفتوش من مده هنا ..!
الطلاب : رايح يصلي استاذ ..
الاستاذ : بقه كده .. طيب
لما رجعت الصف بعد نهاية حصته خبروني الشباب ..
الشباب : ياويلك يا (فلان ) استاذ الرياضيات اليوم سأل عنك
انا : قولوا والله ؟ شو قلتوا له الله ياخذ ابليسكم ؟
الشباب : قلنا له انك رايح تصلي
انا : اهاا جزاكم الله خير بصراحه .. بس شو كانت ردة فعله لما كذي قلتوا له ؟
الشباب : سكت شوي وبعدين قال بقه كده .. طيّب
انا : اهاا .. الله يستر لأن كلامه مايطمّن خاصه لما قال طيّب ..
مرن كم يوم وانا على نفس الموال لحد يوم من الايام الاستاذ الظاهر نفذ صبره ..
سأل الطلبه مره ثانيه : لسه الواد ده بيصلي زي عوايده ؟
الطلاب : ايوا استاذ ..
الاستاذ : فين بقه قلتوا لي ؟
الطلاب : بمصلي المدرسه استاذ
الاستاذ : بقه كده .. طب حلوا المسأله دي لحد ما ارجع لكم تاني ..
الطلاب : تمام استاذ ..
طلع الاستاذ من الصف وانا اشوفه من المصلى متجه لي وطبعا هالزياره المفاجئه والسعيده انا انتظرها واتوقعها تصير بأي يوم هههههه ..
قلت فنفسي ياربي شو هالورطه ؟ الحين هذا شو جابه هنا وشو راح اقوله ..!؟
قرب الاستاذ مني وانا ولا كأني شايفنه وقمت اركع واسجد وادعي ساعه .. اصلي التراويح نعم مو الضحى او الظهر هههههه ..
وقف الاستاذ فتره ينتظرني اخلص وانا بالعكس يزيد ركوعي وسجودي ولا كأني حاس به وشايفنه ..
نفذ صبره اخيرا وقال لي بصوت عالي : لما تخلص صلاتك ياحاج ابقى تعال اوضة ( غرفة ) المدرسين منت طبعا مش حتخلص صلاه الا بعد ماتخلص حصتي انا عارف ..!
انا سكت طبعا وظليت على وضعي وهو راح ..
ياربي شو اسوي الحين؟ مضروب اليوم يعني مضروب ههههه .. بس الافضل اروح له غرفة المدرسين ع الاقل لو ظربني هناك ماراح يضربني وايد لأن المدرسين اللي بالغرفه راح يتدخلوا ويهدوّه اما بالصف بيتولاني ومحد بيقدر يقول له شي ..
بعدما رن الجرس وانتهت حصته وراح غرفة المدرسين رحت عنده ووقفت قدامه بكل هدوء ..
الاستاذ : خلصت صلاتك ياحاج؟
انا بكل براءه : ايوا استاذ والحمد لله ..
الاستاذ : الحمد لله .. إلا قول لي ياواد هو انته صلاتك والتهجد بتاعك مايجيش يعني الا بحصصي انا ...!
انا بكل براءه : شو يعني استاذ ؟ مافهمت قصدك
الاستاذ : والنبي ..! هو انت حتعملهم علي ياواد وعايز تأكلّني الاوانطه ولا ايه ..! كان غيرك اشطر يابابا ..
انا : استاذ انا كنت اصلي وانت شفتني بنفسك .. يعني ماهربت من المدرسه ..
الاستاذ : واللهّي ..!؟ طب آسفين ياسيدنا الشيخ اصلي افتكرتك بالغلط هربت ..!
انا : لا استاذ كله ولا الهروب من المدرسه ..
الاستاذ وصبره خلاص نفذ وعصبيته طلعت : شوف يااد متحاولش تعمل الشويتين دول بتوعك عليّ انت فاهم ؟ قسما عظما ان ماشفتكش من بكره حاضر بحصصي سواء الرابعه او الاخيره حوريك نجوم الليل فعز الظهر .. قال بصلي قال ..! علينا برضه الكلام ده ..! فاهم ياد ولا افهمك اكتر بالعصايه اللي شايفها قدامي دي ..؟
انا : فاهم استاذ حاضر ولايهمك ..
رجعت الصف وعاد الطلاب ينتظروني على احر من الجمر هههههه يبوا يعرفون شو كانت نهاية هاللقاء التاريخي بيني وبين مدرس الرياضيات ههههه ..
خبرتهم باللي صار كله وكلهم قالوا .. بصراحه معه حق .. انت عاد وايد مصختها حشى صلاتك ماتصير الا بحصصه هو بس ..! تستاهل اللي جاك ..
انا : استاهل هاا استاهل .. ماعليكم بسيطه ..
الشباب : ايوا تستاهل .. اشمعنى احنا كل يوم الضرب فينا يعني ؟
انا : كله منكم الله ياخذ ابليسكم حسدتوني على الراحه .. الحين عاد شو اللي بيفكّني منه .. ارتحتوا الحين ؟
الشباب : ايوا ارتحنا ههههه ..
من يومها واضبت على حضور حصصه وطبعا ماله داعي اوضح اثار هذاك الحضور على إيدي هههههه ..
الغريبه اني لما نجحت وانتقلت للصف للسادس اصبحت اشطر طالب بالصف بمادة الرياضيات تحديدا ولحد هاللحظه ما اعرف السبب والله بكل امانه هههههه ربما لأن المدرس تغير بواحد غيره مع انه نفس الشي مثله مصري ..! سبحان الله ..
انتهى ..
طابت لياليكم ...

بقلمي /
اخوكم / رايق البال

[رايق البال]

قصيدة :
سلام يامن تعلى بالقدر والشان
نشرت هنا في :
24 / 9 /2010
الساعه 10:59
رابط القصيده بالارشيف :

http://archive.omaniaa.co/showthread...2862&highlight=

يسعد مساكم / صباحكم

لأحدى الشخصيات الخليجيه كتبت هالقصيده كإهداء.. والإهداء

موصول لكل الأحبه اكيد واتمنى ينال رضاكم ماخطه قلمي

المتواضع ....

من ديرة المجد من دار المحبّه عمان

يممّت دار(ن) سكن فيها رشيق العود

دار الأصاااااله ومنبع آخر الاديان

دار(ن) حماها إلاهي من زمن وعقود

سلااام يامن تعلّى بالقدر والشان

سيد العذارى مليك الناعسات الخوود

سبحان من كملّك اصل وفصل سبحان

يابيرق الحب ياتاااااااج الوفا والجود

جيتك اسلّم وارضي الخاطر الزعلان

جيتك وحرفي له سطوة برق ورعود

جيتك وحرفي يهّل ابمدمعه هتاّن

ومن التحايا اقدم نرجس(ن) وورود

لاهان قدرك ياسيد المها لاهان

فوق الثريّا مقامك والجبال السووود

وختمت حرفي عساك بدنيتك نشوان

ويارب حسودك يموت بحسرته مكمود



اخوكم / رايق البال

[رايق البال]

قصه :
الجريمه الكامله
رابط القصه هنا

http://omaniaa.co/showthread.php?t=50463&highlight=

يسعد مساكم / صباحكم
هلا بالجميع ...

كثير نسمع بأنه لاتوجد جريمه كامله وان لابد من وجود خطأ ما يحدث وتظهر الحقيقه ورغم إيماننا بذلك إلا ان الحياه اثبتت بأن آلاف الجرائم تحدث يوميا ولم يتم التوصل للجناه لأسباب عديده ...
اليوم راح احكي لكم قصه وهالقصه حصلت في دوله عربيه عام 1930 حسبما اتذكر ...

الله يسلمكم مره بنت ومعاها 3 رجال شكلوا تنظيم عصابي وعملوا العجب في السرقات الكبيره ..
اتفقوا ان البنت تنتحل شخصية اميره ذات غنى وجمال وشخصبه استقراطيه والرجال الثلاثه اللي معاها واحد سائق والإثنين حراس شخصيين لها ...
وخطتهم بدأت بإستئجار سياره فارهه وبعدين تركب فيها الاميره ومعها الحارسين الشخصيين والسائق ويروحوا لأكبر محل ذهب ومجوهرات ..
ينزل الحراس الشخصين ويدخلوا على صاحب المحل ويقولوا له : سمو الاميره راح تدخل محلك الحين تختار مجوهرات وذهب لها ..
طبعا صاحب المحل يفرح كثير لأن اللي راح تشتري اميره مو انسانه عاديه وطبعا راح يكسب الآلاف من هالشراء ..
يفتح السائق لها باب السياره وتنزل بكل كبرياء وشموخ والحراسين الشخصين محيطين بها والسائق بسرعه يركض للمحل يفتح لها الباب وطبعا كل هذا يحدث امام عين صاحب المحل اللي يزيد انبهاره ههههه ..
وبسرعه يقربوا لها افخم كرسي وتجلس عليه وصاحب المحل يختار اثمن واجمل ماعنده من ذهب ومجوهرات ويجيبهم للأميره عشان تختار اللي تبيه ..
تختار الاميره طبعا الكثير مما غلى وزنه وسهل حمله وتقوم من كرسيها وتكتب لصاحب المحل شيك بالمبلغ لا وتزيد فيه شوي اكراما له هههههه . وبسرعه اللي معاها يفتحون لها الباب وصاحب المحل يودعها لحد باب السياره وهو فرحان من هالمكسب الرهيب اللي فجأه حصل عليه ..
ولما يروح اليوم الثاني يصرف الشيك يطلع انه بدون رصيد وعاد هو وحظه تحمل الصدمه ولا مات هههههه ..
استمرت هالعصابه على هالأسلوب سرقوا محلات كثير وكانوا يغيروا اماكن سكنهم بالفنادق وبعد بأماكن السرقات وكل يوم بمنطقه من البلد ... بدأت الصحافه تكتب والشكاوي تنهال على الشرطه وهي تحاول تحاصر هذا الأمر وتمسكهم لأن الذهب والمجوهرات المسروق بالملايين كان ..
اخيرا اجتمعت العصابه واتفقوا على القيام بأخر واكبر سرقه لأن الوضع خلاص صار خطير ...
تنكّر واحد منهم بلياس الشرطه وراح لأكبر محل مجوهرات ودخل وسلم على صاحب المحل وقال له : معك الضابط فلان .. طبعا سمعت انت عن عصابة الأميره اللي للأسف الشديد نهبت الكثير من المحلات ولم يتم التوصل لها ..
رد صاحب المحل : ايوا سمعت هالسالفه اصلا عامله بلبله في البلد والكل خايف منها ويتكلم ..
رد الضابط صاحبنا : اهااا .. عليك نور ماشاء الله عليك اسميك طلعت ذيب نعم وراح تسهل مهمتي وايد انته ..
صاحب المحل استغرب وسأله : اشلون يعني .. مافهمت قصدك ؟ وضّح لي اكثر ..
هنا عاد صاحبنا رسم الجديه على وجهه واخذه على جنب وهو يهمس له وقال : عندنا معلومات مؤكده ان هالاميره هي وعصابتها راح تجيك بكره الساعه كذا .. وطبعا انت سمعت عن اسلوبها انها تختار اغلى واثمن المجوهرات .. الخ ..
رد صاحب المحل : ايوا سمعت عن هالموضوع ..
هنا قال له صاحبنا : اهاا .. الحين عاد بقولك شو تسوي .. لما تجيك هالاميره خلي نفسك ماعندك خبر بأي شي واعطيها اللي تبيه .. احنا متابعين للموقف تطمن ولعلمك هي وعصابتها ساكنه فندق كذا .. والحين بروح عنك بس ارجوك خليك ملتزم بالخطه لاتخرب علينا خطتنا واحنا من نمسكها تعال لي المركز الفلاني عشان تستلم مجوهراتك وذهبك وراح نعطيك جائزه نتيجة تعاونك هذا مع رجال الأمن وراح تشتهر والصحافه تكتب عن بطولتك ههههههه ..
فرح صاحب المحل وتطمن ان اخيرا راح يمسكون هالعصابه وكمان راح يشتهر ..
في اليوم الموعود جت العصابه بس هالمره صاحبنا الضابط ماكان عندهم .. اختارت الاميره زي العاده اللي تبيه وبعدها قالت لصاحب المحل : انا مقيمه في فندق كذا ياريت تجيني هناك بعد ساعه ومعاك مجموعه اخرى عشان اختار بشكل افضل لأني شوي مستعجله حاليا وعاد لما تجي بعطيك المبلغ اللي تبيه وفوقه مبلغ هديه مني .. صاحب المحل قال لها : حاضر سمو الاميره ولايهمك راح اكون عندك بالموعد اللي ذكرتيه ..
طلعت الاميره وصاحب المحل يودعها بكل احترام وهو متطمن خاصة وان سكنها طلع نفس اللي قال عليه صاحبنا الضابط ..
وصل صاحب المحل فنفس الموعد للفندق وشاف الضابط يتمشى بالحديقه وابتسم كل منهما للثاني ...
طلع للأميره جناحها واعطاها المجموعه الجديده من اللي جابهم .. اختارت الاميره كل اللي جابهم وقالت له : الحين بكتب لك شيك بالمبلغ وفوقه مبلغ بسيط هديه لك مني .. ولحد ما اجهز لك الشيك اشرب هالعصير وارتاح ..شرب صاحبنا العصير وراح ف سابع نومه ههههه .. شوي إلا والضابط صاحبنا داخل الفندق ويقول لمدير الفندق : بسرعه قول لي الاميره ساكنه بأي جناح ؟ رد مدير الفندق : خير شو حاصل ؟
رد الضابط : بعدين بتعرف نايمين فالعسل انتوا ماعندكم خبر بشي مو كأنكم بالبلد عايشين ..!!
طلع بسرعه هالضابط للجناح وفجأه نزل ومعاه الاميره ومعها السائق وحارسها الشخصي مقيدين وهو يكفخهم ويقول لهم قدام كل المتواجدين ومن ضمنهم مدير الفندق : ع بالكم راح تظلوا دوم تنصبون ع الناس هاااه ؟ ماعليكم انا بوريكم شغلكم .. اعدام فيكم ماراح يكفيني ... وفجأه التفت لمدير الفندق وقال له : جهز فواتيرك وتعال لي المركز الفلاني بعد 3 ساعات لأن تعرف راح اكون مشغول بالتحقيق معاهم وتجهيز الأدله ...
تطمّن مدير الفندق وقام هو وكل المتواجدين بالفندق يشجعوه ويقولوا له : اسميك ذيب نعم .. صلبهم .. الخ .. ( والله اللي يسمع هالكلام راح يفتكر الرايق معهم ذيك الساعه هههههه ) ..
طلع الضابط وقدامه العصابه وركبوا السياره وتحركوا ...
وهم بالطريق فك قيودهم وغيروا ملابسهم وعلى طول للمطار لأن باقي على اقلاع الطائره يادوب ساعه لأن التذاكر خلاص كانت جاهزه والحجز من يومين كانوا مرتبينه هههههه .. خلصوا اجراءات السفر بسرعه واقلعت الطائره ..
بعد اقلاع الطائره بساعه صحى صاحب محل المجوهرات من نومه والتفت حوله ولما ماشاف احد قام يصرخ ونزل بسرعه وهو يصرخ : وينهم ؟ راحت مجوهراتي سرقتهم الاميره واللي معاها .. الخ تلّقاه مدير الفندق وابتسم له يهدّيه وقال له : خلاص تطمن مسكوها العصابه وبعد شوي بروح المركز عند الضابط فلان استلم فلوسي بس شوي اخلص حساب الفواتير وبنفس الوقت اعطيه مجال للتحقيق لأنه قال لي تعال بعد 3 ساعات ..
فرح صاحب محل المجوهرات وتطمن وقال له : اعرفه هالضابط والله انه نشمي ونفس الشي قال لي اجيه المركز عشان استلم مجوهراتي ..
رد مدير الفندق : خلاص عيل بنروح مع بعض ..
شوي وتحركوا وراحوا للمركز اللي قال لهم عليه صاحبنا الضابط ..
دخلوا المركز وهم فرحانين وشافوا احد الضباط جالس بالإستعلامات .. سلموا
عليه وقالوا : لو سمحت نبي الضابط فلان ..
الضابط استغرب من هالإسم وقال لهم : هالإسم مامر علي وماعندنا ضابط بهذا الإسم ..!!
مدير الفندق وصاحب محل المجوهرات ردوا بنفس اللحظه : اشلون ماعندكم هالضابط البطل واحنا من شوي شايفينه ومسك الاميره وبهذلها هي والعصابه وقال لنا نجيه هنا عشان ناخذ حقنا وهي تترحل للسجن بعد التحقيق ..!
الضابط أكد لهم بـأن هالإسم مو موجود معهم وقال لهم : اصلا احنا خلاص على وشك نمسكهم وحتى صورهم معانا .. لحظات بس بوريكم صورهم ..اول ماشافوا الصور إلا وصاحبنا الضابط كان من ضمنهم هههههه ..
هنا عاد بصراحه ما اذكر شو اللي حصل لهم من الصدمه ماتوا ولا جتهم جلطه ولا شو بالضبط هههههه ..!!!
انتهى ... بقلمي

اخوكم / رايق البال

ملاحظه : نشرت هنا لي في 7 / 7 / 2013

[رايق البال]

قصيده :
نفسي اسألك ؟
رابط القصيده

http://omaniaa.co/showthread.php?t=41237&highlight=

يسعد مساكم / صباحكم
لكل الأحبه اهدي بوح قلمي والظاهر القريحه هالايام مطنشتني شوي ههههه سبق نشر هالنص هنا في 13 / 12/ 2011 ...

نفسي اسألكْ
وشْ آخرةْ حبي إلكْ ..!؟
راحْ تقتربْ ...
ولا الهوى بعدهْ حبيبي
(م ) اشْغلكْ ...!؟
ولاجرّبتْ مثلي سهرْ
واشواقْ تاخذني وتمرّْ
وليل(ن ) طويلْ
فيه إتْخّيلني مثلْ
مانا ليالي اتْخيّلكْ ..!
لك اعترفْ ...
ان الحزن فيني طغى
والشوق عمره ماطفى
ولا غبت عني ياغلاي
كلها دقايق بس واجيكْ
وانا ابتسملكْ واحتويكْ
واقول لكْ ...
ماقلّتلكْ ..!؟
انه فراقكْ ...
هدّني ...
ماقلّتلكْ ..!؟
يامن هويتْ ...
حسْ بي وخذني للأمان
كافي دلالْ
بسّْك تعالْ
ولاّ وربّي اللي خلقْ
وبقدرتهْ ...
الطفلْ في مهْدهْ نطقْ
لا اذوّقكْ نار الغرامْ
واشّْعلْ فتيلهْ والهيامْ
واحرمّْكْ لذاّت المنامْ
وارقصّْ الشيطانْ لكْ ..!
للموت احبكْ واهْتويكْ
انت الغرام اللي اقول
وانته هوايا والميول
وكلّي إلكْ
يامن انا لك مملكه
وبْخافقي ...
إنت الملكْ ...
انت الملكْ ...
انت الملكْ ...!

اخوكم / رايق البال

[رايق البال]

ياربي غباااررر
الظاهر نسيتها المدونه

[رايق البال]

بقلمي قصة / ديك ابو محمود
نشرت هنا سابقا حسب هالرابط

http://omaniaa.co/showthread.php?t=3202&highlight=


يسعد صباحكم / مساكم
هلا بالجميع ...

من جديد نلتقي أيها الاحبه وقصه بسيطه من قلمي ...
كنا ولازلنا نسكن في منطقه جيراننا فيها ولله الحمد معاملتهم جميله معنا ومع الجميع ...
وكان من ضمن الجيران الطيبين جارنا ابو محمود ..
رجل كثير كان طيب وكانوا عياله مثله في الطيبه والأخلاق الرفيعه ... مره وانا طالع من البيت بعد المغرب رايح عند الشباب اسهر شفته ولما هو شافني متحرك بسيارتي قام يأشر لي بإيده عشان أوقف ...
وقفت ونزلت من سيارتي وسلمت عليه ..
انا : هلا أبو محمود يسعد مساك .. شخبارك ؟
ابومحمود : الحمد لله كلنا بألف خير .. كيفك انت ؟
انا : الحمد لله .. آمر أبو محمود بشو اخدمك ؟ تبي تروح مكان او شو فخاطرك بالضبط .. قول لي؟
أبو محمود : لا سلامتك .. بس تدري خلاص بيتنا جهز والحمد لله ( كان يبني بيت في بلده ومستأجر البيت اللي ورانا على طول ) وعاد من شفتك الحين
قلت اسلم عليك .. تدري راح ننتقل بعد أسبوعين وجايز ما اشوفك بعدين عشان اسلم عليك ..
انا : اووه جهز بيتكم ماشاء الله ؟ الف مبروك وربي يجعله بيتا عامر بوجودكم يارب .. والله يابو محمود فراقكم صعب لأننا تعودنا عليك وعلى عيالك
الطيبين مثلك وماودنا كان تروحوا بس مالبيد حيله ..
أبو محمود : تسلم والله واحنا بعد ماودنا نروح تعودنا عليكم وعلى المنطقه بس تعبنا ماديا من الإيجار وخلاص دام بنينا بيت احسن ننتقل نعيش فيه مع اننا راح
نفتقدكم ..
انا : واحنا بعد راح نفتقدكم أبو محمود .. و(كملت وانا ابتسم ) .. وراح افتقد الديك بعد ..
أبو محمود وهو مستغرب : أي ديك ؟ مافهمت قصدك ؟
انا وابتسامتي تزيد : هالديك اللي بسطح بيتكم .. ياخي ماصار ديك هذا والله .. انا اللي اعرفه ان الديك يصقع او يصيح عند كل آذان للصلاه ..
يعني على عدد الصلوات بس هالديك مصخها ههههههه من يقوم الفجر لين ينخمد نصايف الليول وهو ماعنده الا كوكووع وكوكووع .. كوكووع وكوكوووع ..!! ..
كأنه بس هو الديك الوحيد الموجود بالمنطقه هههههه ..
أبو محمود وهو ميت من الضحك : الله ياخذ ابليسك .. قتلتني من الضحك نعم ههههههه ..
انا : صدقني والله ولعلمك كأنه يتعمد يعاندني ..!! أرجع من الدوام الظهر وأقول الحين بتغدا وبنام شوي بس اظل ساعه اتقلب لين يجيني نوم بسبب هالديك وصقيعه كل شوي وبالليل نفس الشي لما ارجع من سهرتي اظل ساعه أحاول انام بسبب الربشه اللي مسونها وصياحه .. لا ومرات يقفز من فوق سطح بيتكم ويوقف في جدار حوش بيتنا وعاد انت تعرف ان غرفتي مقابله بيتكم وساعتها يتمشى هو على الجدار ويبدع ف صياحه عشان يقهرني اكثر وانا فيني اللي فيني من القهر منه ههههههه .. تصدق بقولك شي جايز تستغرب منه ..
أبو محمود وهو يضحك : ايش هو .. قول ؟
انا : لعدة مرات افكر اجيك عشان اكلمك اشتري هالديك من عندك
أبو محمود : ليش عاد ؟
انا : شو ليش أبو محمود ..!!؟ أبا اخليه بالغرفه واقفل الباب والدرايش واجلس اطارده لين اهدّ حيله وبعدين اخنقه وابرد قلبي من القهر اللي فيني منه ههههه ..
أبو محمود وهويضحك : اهااا كذي السالفه هههههه ... خلاص بريحك منه ولايهمك وبشله لما بنطلع من البيت ههههههه ..
بعد أسبوعين انتقل أبو محمود وعم الهدوء بعد رحيل الديك ..
بس سبحان الله بعد مرور عدة أيام افتقدت صياحه وربشته وبالفعل أشياء كثير بحياتنا أحيانا تضايقنا بس لما نفقدها نرجع نشتاق لها ونفتقدها .. بدليل كان هذاك الديك رابشني ...
صح انه جنن بي بس والله كان مسوي جو بدل هالهدوء الحين ههههههه ...
انتهى .. بقلمي

اخوكم / رايق البال

[رايق البال]

شهر ونص تقريبا نعم ولا مامريت صوب هالمدونه
بالله عليكم مال مدونات انا هههههه

[رايق البال]

قصه بقلمي / ياترجع الخمسه ريال .. يا ؟
رابط القصه

http://omaniaa.co/showthread.php?t=9697&highlight

يسعد مساكم/ صباحكم
هلا بالجميع ...

عوده جديده لقلمي وقصه لاتخلو من الفكاهه كالعاده وطبعا اتوقع الآخ العزيز عابر سبيل راح يقول اعرفك راعي مشاكل رايق بس والله هي الظروف اللي تخليني بهالمواقف شو اسوي يعني ههههههه ..
احنا مجموعة شباب تربطنا صداقه عميقه ببعض من ايام الدراسه وبعضنا مع بعض بالعمل والبعض الآخر في جهات حكوميه اخرى يشتغلون ..
تعودنا نلتقي كل اسبوع في احد المطاعم بمسقط نسولف ونعيد ذكرياتنا ونخطط لرحله لبلد او منطقه معينه وبعد العشا والسهره كل مننا يرجع لبيته ..
من ضمن الاصدقاء كان واحد شوي ماسك ايده ( بخيل يعني شوي ههههه ) وكنا دايم نعلّق عليه وخاصه انا اجنن به ..
نادر يتصل بنا وكل تواصله بس عن طريق المسجات لو استجد شي او عشان نرتب للسهره او نروح رحله .. الخ ..
يوم من الايام فجأه جاني اتصال منه وجلس يسولف ويضحك وماخذ راحته على الآخر وانا مستغرب من تصرفه ..!
بعدما خلص اتصاله جلست افكر مع نفسي واحلّل هالتصرف وماقدرت اوصل لنتيجة معينه ..
بعد يومين التقيت بالشباب بالمطعم وظلينا نتظر صاحبنا يوصل ..
وانا معهم فتحت سالفة اتصاله بي واستغرابي منه لأن كلنا نعرفه نادر يتصل ..
تفاجئت ان الكل اتصل فيهم هذاك اليوم اصلا مو بس انا ..!
هنا قلت لهم : شوفوا شباب .. سالفة ان فلان يتصل بي انا مستغرب منها بصراحه لأن كلنا عارفين بخله وكنت ناوي اسأله بس استحيت .. بس طالما انه اتصل فيكم كلكم معناها السالفه فيها شي .. والله مابخليه اليوم لين اعرف السبب ..
الشباب بصوت واحد : حرام عليك .. خليه شو تبي منه ؟ يمكن حس والله هداه وتغيّر ..!
انا : لالا ماتغيّر .. السالفه فيها شي صدقوني وماراح ارتاح لين اعرف ..
الشباب : تمام .. عيل عليك به ..
طلبنا عصير طازج لكل مننا وكلها ربع ساعه ووصل صاحبنا ..
احنا كلنا مبتسمين بإنتظاره والشباب كل منهم يهمس لي : وصل ترا صاحبك .. عليك به ..
انا : تم ولايهمكم .. قال تغيّر قال هههههه ..
وصل صاحبنا وكان معصب وايد ومن شكله واضح انه متضايق ..
سألته بكل براءه : سلامات الحبيب .. شو فيك؟ عسى ماشر ؟
صاحبنا : لا عادي .. مافي شي
انا : شو عادي ..؟ ترا واضح عليك انك متضايق ..! وبعدين تعال قولي .. ياترى شو سبب هذاك الكرم الحاتمي المفاجئ اللي نزل عليك فجأه ههههه واتصلت بي وبكل الشباب هذاك اليوم حسبما خبروني .. اعترف يالذيب لايكون طحت على كنز واحنا ماندري ههههههه ..
صاحبنا : ارجوك لاتذكرني .. اللي فيني فيني ترا ..!
احنا بصوت واحد وعاد زاد الفضول فينا : ليش؟ شو صار ؟ احكيلنا ..
صاحبنا : الله يسلمكم وانا بالبيت جالس العب بالفون فجأه جاني تحويل بقيمة ( خمس ريال ) من رقم مجهول ..!
استغربت وظليت انتظر ربع ساعه ربما يرسل انه غلطان بالتحويل او شي بس مارسل لي ... وعقبها عاد قلت فرصه اسلم على الشباب وقمت اتصل فيكم واحد واحد ..
انا : اهااا كذي السالفه ..!! وانا اقول ليش متصل بي هذاك اليوم .. اتاريك محصل رصيد ببلاش .. عيني ياعيني ناس لها حظوظ فعلا هههههه
صاحبنا بعصبيه : اسكت انت اسكت .. اصلا محد بيجنن بي غيرك ولا كلهم ساكتين إلا انته يبو لسانين تسأل مية سؤال ..
انا : خلاص توبه والله مابقول شي .. كمل السالفه هههههه
صاحبنا : بعدما اتصلت فيكم كلكم وراحن تقريبا اكثر من ريالين فجأه جاني اتصال من نفس هذاك الرقم وكان المتصل حرمه ..
الحرمه : مساء الخير اخوي .. لو سمحت انا حولّتلك بالغلط من ساعه ( 5 ريال ) رصيد ..
صاحبنا : بالفعل وصل هالمبلغ واستغربت من الرقم لأنه مو مخزن معي وظليت انتظر ربع ساعه لعل وعسى صاحب الرقم يتصل او يرسل يستفسر بس ماجاني لا اتصال ولا مسج منه ..
الحرمه : انا انشغلت شوي وعلى بالي المبلغ تحوّل لأختي .. بس هي من شوي اتصلت فيني وقالت ماوصلها الرصيد ولما شيكت مره ثانيه على الرقم عرفت اني حولت المبلغ بالغلط .. والحين لو سمحت اريد ترجع لي المبلغ اللي حولته لك ..
صاحبنا : بالفعل هذا حقك اختي ... بس والله مدري شو اقولك ..!؟
الحرمه : شو يعني ؟ مافهمت قصدك ..!
صاحبنا : الله يسلمك لما شفت محد سأل عن المبلغ توقعته واحد من الربع طلع رقم جديد وكان يبي يفاجئني بالرصيد وعاد تدري قمت اتصل بالشباب اسلّم عليهم .. صار لي زمان ما اتصلت فيهم ..
الحرمه : لا والله ؟ تتصل بالشباب هاا برصيدي انا؟ ياسلااااااااام ..!!
صاحبنا : هذا اللي حصل وماكان قصدي والله وخلاص ولايهمك راح ارجع لك المبلغ الباقي واظن في حدود ريالين باقي بس منه .. تدري مع الشباب شوي خذتنا السوالف وماحسيت بالوقت ههههههه
الحرمه : ياسلاااااام ؟ عيني ياعيني سوالف هاا ماخذ راحتك وايد ماشاء الله..!! شوف هي كلمه ورد غطاها .. ياترجع الخمسه ريال اللي حولتهن لك بالغلط .. يا ادعي عليك وتحمل بهن ليوم الدين ..
صاحبنا : لا ارجوك كله ولا هالكلام .. خلاص بتصرف وبرجعهن لك ..
الحرمه : تمام .. عيل انتظر ولا تتأخر وايد قال خذتني السوالف قال ..! ..
تصرف صاحبنا ورجع لها الرصيد حسب المبلغ اللي كانت محولتنه له ..
انا وعيني تنظر للشباب وميت من الضحك : ماقلتلكم السالفه فيها شي هههههه .!!؟ عشان تصدقوني بس مره ثانيه لما اقول شي ..
صاحبنا وهو معصب : والله ان زدت كلمه غيرها .. بروح ترا عنكم وبزعل
الشباب بصوت واحد : ياخي اسكت عنه حرام عليك .. اللي فيه يكفيه .. صدق انه محد يتوهج فيك انته ..
انا : خلاص بسكت بس والله ترا كنت امزح ولا انتوا كلكم عارفين ان غلاكم عندي واحد ههههه ويالله عاد فرفشوا وطلبوا عشا ميت من الجوع احس نفسي والله ..
الشباب : تم .. الحين بنطلب عشا خلاص ..
طلبنا عشا وتعشينا وكملنا سوالفنا وضحكنا وصاحبنا معنا يضحك بعدما نسيناه السالفه ودفعنا عنه كالعاده هههههههه ..

انتهى .. بقلمي
اخوكم / رايق البال

[رايق البال]

الإدارة العليا للسبلة العمانية
رئيس طاقم الإدارة العليا ورئيـس المرشحـين والرئيس المباشر لسبلة رواق الشعر والخواطر والقصص والشيلات

---

تاريخ التسجيل Aug 2010
الدولة فهالدنيا
الجنس 1
المشاركات 52,921

ترقيت ههههه ولو ان القابي كشاعر وكاتب قصص وخواطر راحت

[رايق البال]

قصه بقلمي / العالم الجليل ونائبه
رابط القصه
http://omaniaa.co/showthread.php?t=51774&highlight=

يسعد صباحكم / مساكم
هلا بالجميع ..

نلتقي مرة اخرى ايها الاحبه وقصه بقلمي يغلب عليها الطابع الكوميدي ربما لكوني لا اميل كثيرا للتراجيدي والكوميديا السوداء وغيرها من انواع القصص ..
في احد القرى كان هناك يعيش شاب ..
هالشاب كان صايع ضايع لا صلاه ولا عباده ولا شغله ولا مشغله ..
لحد يوم من الايام قرر يرحل عن قريته على امل يشوف قريه يستقر فيها وتتحسن اوضاعه وتتعدل ..
ومن قريه لقريه ومن بلد لبلد لحد ماوصل لقريه كان ناسها بسطاء للغايه وعددهم قليل وكلهم اميين ..
لما وصل مدخل القريه التقاه شخص وعزمه للغدا ببيته لما عرف انه غريب وهو يقدم له واجب الضيافه سأله صاحبنا بكل عفويه : مالاحظت بقريتكم مسجد ..! انتوا وين تصلوا ؟
تنهد الرجل وهز راسه بأسى وقال : للاسف احنا ناس جهله واميّين ومانعرف نصلي ولا نعرف آيه من القرآن ..!
هنا عاد صاحبنا اظهر الجديه على وجهه ومعالم الغضب وقال : يعني شوو ؟ شو هالكلام اللي اسمعه منك ؟ لا حول ولا قوة الا بالله العلي العظيم .. هذي صلاه وعباده مايصير هالكلام ..!
الرجل انحرج وقام يبوس راسه على باله انه شيخ جليل وعالم وقور هههههه ويستسمح منه ويقول : اعذرنا الشيخ والله احنا ماودنا نكون كذي بس ترانا مانعرف شي والحمد لله اللي جابك لقريتنا عشان تعلمنا اصول الدين وتكون امام تصلي بنا وراح نتكفل بأكلك وشربك وسكنك ... ارجوك وافق عشان اروح ابشر اهل القريه .
صاحبنا تورط وهز راسه وهو يقول بخاطره : ياربي شو هالورطه اللي انا تورطتها ..!؟ انا بروحي ما اعرف اصلي ولا حافظ آيه من القرآن هههههه .. شسوي الحين بهالموقف ..؟
هو يكلم نفسه والرجل يطالعه وينتظر رده بفارغ الصبر ..
بعد شوي عدّل صاحبنا من جلسته وقال بكل هدوء : والله ياخي هذي مسؤوليه كبيره ولكن راح اقبلها وان شاء الله اوفق فيها وانا انسان ادوّر الاجر وعسى الله يتقبل مني ..
الرجل فرح وقام يبوس راسه مره وهو يجلّه ويقدره وطلع بسرعه وبشر اهل القريه وخبرهم باللي صار ..
فرحوا اهل القريه وجوا كلهم يسلموا على هالعالم الجليل ويشكروه على هالجميل اللي راح يسويه وصاحبنا يتكلم بهدوء ووقار بأنه يبغى بس الاجر ..
وبعد السلام وعبارات الشكر اللي انهالت على صاحبنا قال لهم بكل ثقه وهدوء ان الصلاه راح تبدأ من بكره لأنه اليوم واصل ومرهق من الدرب .. وكان هو طبعا يبي يجلس مع نفسه ويرتب الموضوع يخاف يتورط ههههه ..
لما حانت الصلاه باليوم الثاني وقف قدامهم كإمام وهم خلفه وقام يقول اي كلام يخطر بباله وبآخر الكلام يقول الله اكبر واهل البلد يرددوا وراه مساكين على بالهم هذي هي الصلاه ..
استمر على هالوضع عدة ايام وفجأه لمعت بعقله فكره جهنميه وقال الحين اهل القريه دام مايعرفوا شي وعلى بالهم اللي اقوله هو آيات قرآنيه ليش ما استغل الوضع؟ تعبت كل يوم نفس الاكل تقريبا ولابد اتصرف فهالموضوع ..
لما حانت الصلاه وقف كالعاده امام لهم وقام يقول .. ( ايها الناس اطعموا اليوم معلمّكم الدجاج وبعض الفواكه .. الله اكبر ..) ..
بعد الصلاه جاب له غداه الشخص اللي عليه الدور وتفاجأ ان غداه هالمره نفس اللي حدده لما كان يصلي بهم ..
فرح صاحبنا وقال ياليتني من الاول كذي سويت كان كل يوم غداي غير وعشاي غير ههههه ..
استمر شهور على هالوضع كل يوم يحدد لهم اللي يبي ياكله وهم مساكين يسووه له ..
لحد يوم من الايام كان يصلي بهم الظهر وقال ( اليوم اطعموا معلمّكم السمك واللحم وفاكهة من الموز والرمان .. الله اكبر ) ..
فجأه ..
سمع صوت شخص من آخر الصف يتحمحم ويقول : سبحان الله ..
دار راسه صاحبنا لأن هذا معناه حد فاهم موجود من ضمن اهل القريه او شخص غريب وصل القريه وعارف كيف الصلاه والقرآن ..
فكر بسرعه وهمس بقلبه ياربي شو هالورطه ؟ شسوي الحين لو طلع هالشخص فاهم؟ راح انكشف وانفضح اكيد .. وهو يفكر بسرعه فجأه جته فكره وقال بقلبه .. لقيتها لقيتهاا .. راح اعيد القراءه مره ثانيه بنفس الكلام ولو كرر كلامه وتحمحم معناه شكّي في محله ولازم اتصرف بسرعه ولو ماقال شي معناه الوضع عادي وماعلي خوف ..
كرر اللي قاله وهو قلبه يرجف من الخوف واذنه على آخر الصف يبي يشوف ردة فعل هذاك الشخص ..
تحمحم الرجل هذاك مره ثانيه وقال : سبحان الله ..
هنا عاد تأكد صاحبنا ان هالرجل فاهم ولازم يتصرف بسرعه عشان ماينكشف ..
وبسرعه جته فكره جهنميه وقال راح انفذها وعسى بس يفهمها ..
قال بكل خشوع وهدوء ( يا ايها المتحمحمون لا تتكلمون لكم رزق مما يعطون من ثيران بلا قرون .. الله اكبر ) ..
قالها وقلبه تزيد رجفته من الخوف يبي بشوف شو راح يكون موقف هذاك الرجل وردة فعله ..
فجأه سكت الرجل والشيخ صاحبنا ارتاح وتنفس الصعداء على قولتهم بعدما تطمّن ان الرجل فهم قصده هههههه وانتهت الصلاه وقاموا يسلموا على بعض ولما التقت عين الرجل بعين الشيخ الجليل كل واحد فيهم تبسّم لصاحبه وغمز بعينه هههههه ..
صاحبنا قال لأهل القريه اليوم غدا هالشخص الغريب معي ..
رد اللي عليه الدور : تمام شيخنا ولايهمك وضيفك ضيفنا كلنا ..
راحوا اهل القريه كل واحد لبيته والشيخ والرجل مع بعض راحوا ..
قال صاحبنا للرجل : والله انك فعلت خير لما سكت ولا كنت بتورط ..
رد الرجل : تراني فهمت قصدك عشان كذي سكت مع انه دار راسي من الكلام اللي تقوله بالصلاه..! خبرني شو سالفة هالقريه واهلها ؟ وشو هالصلاه الغريبه؟
رد صاحبنا : انا بعد دار راسي لما سمعتك تتحمحم وتقول سبحان الله وقلت ف خاطري ياربي من وين هذا طلع لي بعد ..!؟ انا صار لي سنين ومنين ضاحك على هذولا وبالاخير يجي هذا ويكشفني وانفضح ..! ويطلّعني من النعيم اللي انا عايش فيه ههههه ..! وقلت خليني اسوي هالحركه لعل وعسى يفهم ويسكت والحمد لله انك فهمت الحركه وسكت ولا كان ياويلي منهم ههههه ولد الحلال هذولا ثيران وبصراحه انا واحد صايع ضايع وهم على بالهم اني عالم وشيخ جليل وعاد انا من شفت كذي وضعهم قلت شو مكلفني اتعب عمري ؟ خليني معهم مرتاح .. ماكل شارب نايم من ظهر هالثيران لا واحدد اللي ابيه بعد ههههه ..
ضحك الرجل وقال : اهاا .. كذي السالفه عيل ؟ وانا اقول ليش كذي يقول لما يصلي بهم ههههه؟ ..
ضحك صاحبنا ورد عليه : الحين عاد دام تعارفنا وتفاهمنا .. شو رأيك اخبرهم بأني اخترتك نائب لي؟ وانت شايف كيف انا مرتاح واموري طيبه هههههه ..
ابتسم الرجل وقال : افا عليك تم .. حد يرفس النعمه بريوله ههههه ..!
صاحبنا ضحك ورد عليه وقال : خلاص عيل ولايهمك .. راح ارتب الموضوع اليوم ان شاء الله ..
قبل الصلاه قال الشيخ لأهل القريه اليوم بعد الصلاه لاتروحوا اريد اكلمكم بموضوع مهم ..
ردوا عليه تم شيخنا ولايهمك انت تأمر امر ..
بعد الصلاه وكل واحد من اهل القريه ينتظر بفارغ الصبر كلام الشيخ ..
تنحنح الشيخ وعدّل من جلسته وقال بكل هدوء ووقار : يا اخوان الانسان تحكمه ظروفه وانا اليوم معكم وقايم بواجبي ..
قاطعوه اهل القريه وردوا بصوت واحد : احنا نشهد والله ان لولاك انته كنا في ظلام نعيش ..
رد الشيخ بوقاره المعهود وهدوءه وقال : جزاكم الله خير .. الموضوع اللي اريد اكلمكم فيه هو اني انسان اولا واخيرا .. جايز امرض او اموت او ارحل او اي شي يصير وحرام بعد كل الجهد اللي بذلته ترجعوا للجهاله وعصر الظلام .. عشان كذي راح اخلي هالرجل الغريب نائب لي ويكون بدالي لو صار لي شي لاسمح الله وتطمنوا انا اختبرته وماشاء الله عليه طلع رجل تقي وورع وحافظ القرآن صم مثلي طبعا .. شو قلتوا ؟
ردوا اهل القريه : الله يعطيك طولة العمر وعسانا ماننحرم منك شيخنا .. ومن بعد كلامك احنا مالنا كلمه .. كلمتك على قدام وجزاك الله خير دوم تفكر بمصلحتنا .. وقاموا يبوسوا راسه ويشكروه وهو يردد استغفر الله .. استغفر الله ماله داعي الشكر يا اخوان انا منكم وفيكم وانا انسان ادوّر الاجر ..
كل هالاحداث تصير قدام هذاك الرجل وهو ساكت ويهز راسه ويقول بقلبه ( حسبي الله على ابليسك اسميك داهيه نعم ماينقدر عليك هههههه ) ...
وعاش صاحبنا ونائبه في القريه معززين مكرمين المده اللي كانت لهم بالحياه ..
انتهى ..
بقلمي
اخوكم / رايق البال