｡• روان ومدونتهـــــシــا •｡

[روانـــــووو]

كل الشكر للوالد انه عبرني🙂💙.

[روانـــــووو]

قصتي الأولى بعنوان ( إهــدام حـــيـــاة )

http://omaniaa.co/showthread.php?t=114799

من هنا 👆 بسبلة القصص والرويات تابعوني ☻

[روانـــــووو]

بارك الله لكما وعليكما وجمع بينكما على خير
خالي الوليد مبروووووك 😍😍❤
والله يتمم لك ع خير ويارب تظل مثل ما أنت و ما تسحب علي يعني توديني كارفور وكذا ☻
والله يووووووفقك ويا حظهاااااا العروس يوم رضيت فيها أمزح تحمست قصدي يعني إن مبروك 😹😹😹

[روانـــــووو]

في جامعة قابوس يدرس حبيبي
يا الله !
ياب الشهادة اليوم حظي ونصيبي
يا الله !
عيني يبو فانيلة وسرى الليل وحليله وسرى الليل وحليله

طالعة من الحمام ناشلة شعرها
يا الله !
واحد حبيب الروح وتسعة كشرة
يا الله !
عيني يبو فانيلة وسرى الليل وحليله
وسرى الليل وحليله ☻💓

[روانـــــووو]

😋💪

[روانـــــووو]

وضعي لما يكون ملل وناسية باسورد السبلة وعندي فرصاد🍇😿

أول أمس فتحت السبلة وحركات وكذا بعدها طلعت ورجعت بعد المغرب ولا شو اونه قومي غيري الباسورد من زمان ما غيرتيه والمدة عدت ، وأنا بعد بدل لا أخليه مثل ما كان لا حطيت باسورد غير ، وفي اليوم الثاني عصرت مخيخي أحاول أتذكر ولا شي فايدة ، فوق الخمس مرات غلط بعدين انتظرت دقايق ليفتح وحاولت بعدني ولا شي فايدة ، بس الحمدلله الإدارة فتحوه لي ياه مرة ثانية 😍💃💃💃

[روانـــــووو]

مرحباً بالجميع

طبعاً ما قدرت أنام مع إني مابا أرمس أبا أقوم الصبح من وقت ع فكرة اليوم الساعة 10 كنت واعية عادي وشفت الناس تلعب لا وبعد بقسمنا مائة بيسة وأميرة الروح وبدر الدجى كنت أشوفهم من بعيد أحدق إليهم وايد كان خاطري أدش وبعد رجعت أحاول أتذكر الباسورد بس ماش عيا يطلع

طبعاً قبل شويات والله ما أدري مع إنه إجازة بس تراني شوية منتزقة وأبا الدوام يرجع أوني أقرأ كيفية المذاكرة الفعالة 😅 انزين ماما الدنيا اجازة وش ذا الخفية بدل لا أحط راسي وأنام ع المخدة لا وف داخلي بعد أقول بغير ربيعاتي اونه مضيعاتني يابوي إنتي مضيعة بلد 😹😹😹

عاد هالنقطتين بذات أنا

احرص على أن تجلس جلسة انتباه لا جلسة استرخاء عند المذاكرة، فلا تذاكر وأنت مستلقياً أو منبطحاً فتنام .

لا تقلق عندما ترى الطلبة الآخرين يسلمون أوراقهم فليس هناك جائزة لمن ينتهي أولاً .

اي والله إنكم صادقين ماشي جائزة بس تعرفون قاعة الإمتحان مملة تجيب الصداع 😝 مهم شو أخربط نحن مأجزين فلنستمتع ، فلنمرح ، فلنسافر ، فل ، فل ، فلافل ، فلفول يحب الفلافل ، فل ، فل ، فلافل ، غذاء سليم متكامل 💃💃💃 آسفة ترا والله مليت وتذكرت سبيس تون العشق ، ما أحبني يوم أشخبط في الليل ، ليش ؟ لأني يوم أقوم الصبح وأقرأ أحسني وقت ما أكتب داخل ف راسي يني ولا أي شي لكن لحد يحاول يقنعني بليز يعني إني طبيعية ! لا وأفكر أمسحها فضيحة لحد من أهلي يشوف مدونتي بس ترا ما يعرفوا السبلة إلا أبوي وقسم انصدمت لما عرفت عمي عن طريق السبلة مرة باع سيارته !! وأنا خبر خير أكيد ما بعرف ذا كله دامني ع مدونة وما مدونة أما أختي تشوف ذا البلاوي طبعاً أوجه لك تحية من هذا المنبر وأصلاً أنا أكبر منها ، هي اونه المنتديات مال أول قلتلها تسجل بس برايها ما مهم وجودها العبيط 😷😝😝

ما ناقصة بعد فيها كمية أنانية يعني وقت الامتحانات أنا في الحجرة وشادة حيلي ومتحمسة والطيبة تفتح الباب مرة تخليه مفتوح وتروح ومرة تدخل وتتكلم هي و شهد وأنا م شي مالي أي اعتبار ليش شذيه ولا كأنه في إنسانة ولا كأنه عندها امتحان ولا كأنها ما تعرف تنظم وقتها برمضان وعادي ، لكن والله العلي العظيم لا تشوفين وحدة ثانية الفصل الياي وبنشوف إن ما نتفت شعرج ع هالحركات السخيفة ، وعادي ترا اذا فصلت أخذ كتبج و شوتها بزبالة من يتوقع إني بسوي كذا ؟ هاه

تباً لك كم تقهرينني !!😔



أمزح صح إني وياها وايد في علاقة تنافر بينا بس مهماً كان ذي شريكة حياتي اوبس قصدي يعني نسكن في بيت واحد وتحت سقف واحد وكذا 😵 من بعد م فتحت عيني شويات ولا وصلت ع الدنيا لكن من الحقارة إنها تتعمد تضايقني وتختار وقت الامتحانات بعد لكني ساكتة دامني فاونديشن لكن خليني أدخل تخصص والله ثم والله لا أعضج و أشمخ ويهج وأجحره 😈

ايه لا صدق يعني خلاص نحن اجازة يعني لازم نحللها اممم وش نسوي ويش ويش اوك أول ما نقوم الظهر كلنا نتغدا واو حماس غدا تفتح عينك وتتريق عيوش واو الميزة ذي حلوة وبعدين العصر طويل ما نعرف شو نسوي يا سلام يا سلام وش وش بعد اممم اوك تذكرت تجلس ملان طول المغرب وتفكر في العشا عاد هاذي لعبتي وبعدين النت يقطع بالضبط كقطرات الندى في الصباح ، الحمدلله والله الإجازة فنانة عاد أحلى شي يوم تحاول تضبط نومك وما شي فايدة

[روانـــــووو]

اونهم مال السبلة يعني راقدين م دري نايمين باستثناء الجنيات الثلاث 😹😹 مهم تو وش الدبرة لو عندي فرصاد برسم لوحة كاملة بس ماشي كليته كله ولا بقيت شي أبرز فيه موهبتي تو زين كذا لا فرصاد ولا حتى نوم بس كذا أطالع السقف حتى السقف ما أشوفه الليت مبند تو ذي حالة بالله عليكم !
حالتي ذي ما سيئة نعم أيام الثانوية هناك الحالات ع أصولها

اندوكم كيف كنا الحمدلله عدت عدت ، ولا شو الناس صايمة ونحنا نهيس ف الشمسان صح إنه يعني نمتحن داخل بس مدرستنا غير نمونة من نخلص شاتونا برع ف الساحة عاد قبل رمضان هناك اللعبة !!! الفصل الأول لاه شاتونا ف الساحة وأم سلمة اسم الله عليهم لا رقابة ولا هم يحزنون بس المديرة ترا تو وايد اوك وماسكة البنات ويسولهم احتياط اخر مديلاته لا للاحباط ف حصة الاحتياط 😂😂😂😂😂😂😂😂😂 واه بموت أي احباط يا حسرة يعني بس قافية والسلام لا ومسوين هذا شي متنقل فيه مطويات يعني عشان ما ننحبط اسميكن 😂😂😂😂 أفلام ، مهم الروعة يوم نروح الدكان عادي ما شرده بس الباب مفتوح روحي الدكان مع شلة هاه ما تخطفي بروحج ، طبعا أمي خبرتها وقالت إذا صحبة أمان وبنات وايد عادي خفت لا أحصل حد هناك ف السيف ويقول شي دام عندي تصريح الأمور مرة طيبة ، ي الله حلاتهوو ذيك الأيام ما تو لا نسحب المراوح ولا نطلع الدكان ولا نركض ولا نضحك إلا في الأماكن المخبئة للفتيات فقط ولا حتى نشتري أسكريم توت نحمر شفايفنا فيها والمعلمات يعرفنا متعمدين واحنا لا بالغلط 😹😹😹



انزين وبعدين يعني سوالف وسولفنا وصلت لين ثاني عشر ، فصلات وفصلنا يعني ما بنرقد هاه شكلي من الناس هذيلا اللي فاتحين النت وحتى لو يتثابوا ومرة خلاص عيوناتهم تغفي ما يتركوه لا يتشكو يعني تو من صدقي فاتحة المدونة وأكتب وبرقد يعني كيف والفون وفي ايدي وذا سلامات ؟ لازم عشان النومة تهل علي أستعدلها وهذا اللي بيستوي تو ،،، يلا مع السلامة بيباي بالانجليزي قود باي

[روانـــــووو]

صورة هذه الطفلة قد فاقت الموناليزا في روعتها .. قولوا لي أيها الاخوة هل هي : إبتسامة رضا ، أم ألم ووجع ! أم عتاب أم شكوى أم سخرية من الظالمين؟؟

[روانـــــووو]

مرحبااااا الساع ✋😻

ها أنا وصلت ذا ، ما بقدر أدخل السبلة مسافة الطريق بس لحد ما نلقط شبكة هناك بسوي اشتراك نص يكفيني وإذا شسمه بوايج هنا ما مشكلة



مضبطة روحي وأمي وأختي 😎 صراحة زين أبوي وافق الأناناس طلع بفايدة 😹😹

اونه صلالة بس حشيش ونوق وبقر 🙈 انزين وشرايك إني حابة هالبقر آيلاااڤ ناقة بس نطلع شوية تعبت وأنا أشوف سنابات هالخلق اللي ما يراعون مشاعري وإحساسي المرهف 🚶



ترا الكلمات روعة والفيديو كليب 🔥🔥🔥👌




ببنطلق بعدين بالليل المتأخر كذا ع ساعة 12 😴

صح اونه حبوتي الجميلة لحظة



الحب حبوتي مرررررريوووم😘😍😍😍❤❤💘

❤ = R + M

👆 مريووووووووووم + روان = حب للأبد 💘

💘 ، فديتها ياخي أحبهااااااااا مووووت وبقوة وشرارة وكل شي جعلني فدوة والله يا حبيبة قلب قلبي يا الله كيف تشلع فوادي شلاع 😙😙❤

مهم الوحيدة من حفيداتها اللي لما نروح أحصلها ضامتلي بطاطس عمان وصحار و لوى 😹 المرة لما روحنا نسلم عليها حصلتها يايبتلي قطعة مخور يا ربي أمووووت ولا كيف وع فكرة أختي ما مخلتلها شي 😅😅 ، عاد أبوي ما كان مخلي ف باله إنه ياخذها معنا بت بعدين تغير المخطط أمي بتجلس ف البيت مع عبادي و عزوز وحبوتي الحب بتجي بدالها ، أمي يعني مسوية إيثار لا خلاص بجلس أنا ف البيت عادي ☻

اللهم يحفظهم كلهم حبوتي المتربعة ف نص قليبي ويدي اللي ما شفناه اليوم وأبوي وأمي وحِياني كلهم 😘❤