الــدار صــدت
الدار صدّت ما تلقّي جابه .... الحر الأشقر كسّرت مخلابه
لاهو على الصيدات ما دمّاها .... معاقيد من صيدته مضلابه
ما راح نشوف أكثر مما شفنا .... صرنا شحم جنزير للدبابة
قلنا خلصنا من عيال الخكري .... وابو براطم ذاك هوه اصحابه
وترجع لنا الديرة مثل ما كانت .... والبيت بالمفتاح سكّر بابه
لكن بلانا صـــــار منّــا فينا .... حـنّـــــا فتحنا الباب للنـهابه
خير البلد للغير هذي البلوة .... وراع البلد من هالتعب وش نابه؟
ما المشكلة عاش الغريب امدلل .... ولا تعيش أم أحمد الخطابه
المشكله صرنا ابلدنا قلة .... نسبة وتناسب وين هالحسابة؟
ضاع الكويتي بالكويت بلاده .... كيف الوطن بأهله تضيق ارحابه
ابن الولد شاف الغبن بعيونه .... ولو صاح بأعلى صوت ماحدٍ ثابه
الواضح أصدق وصف لابن الديرة .... غريب ببلاده وبين أحبابه
يا ناس صرنا جاليه بديرتنا .... راعي البلد ماحدٍ يحسب احسابه
تلقى الغريب بدارنا متفرعن .... ناره على راعي الوطن شبابه
في ديرته ياكل تبن بايدينه .... وفي ديرتي يرفع علي مصلابه
في ديرته مسلوب حتى رايه .... وفي ديرتي يفتل عليَ اشنابه
في ديرته يهاب حتى الشرطي .... وفي ديرتي حتى اللوا ما هابه
واذا تكلمت ابتلشت بعمرك .... بين المخافر قصة واطلابه
الموت تلقى الحق دايم معهم .... عيال عمه فزعته واقرابه
والقاضي راضي والهوى وياهم .... مبروووك لازم تلعب اللعابة
هذي سوايانها وفعل ايدينا .... اللي جرا كلنا نعرف أسبابه
من جاب هذا الأجنبي لبلادي .... من وقع الفيزا وخط اكتابه
قبل تلوم الناس ، حاسب نفسك .... لا تلعنه ، العن ابو اللي جابه
يقولها راع الوطن متحسر .... صاب الهدف ولا بعد ما صابه
الدار جارت ولا حنّا جرنا .... الحر الأشقر من كسر مخلابه
رد مع اقتباس
المشاركة الأصلية كتبت بواسطة صدى صوت
