من اشعار الشاعر الكبير (سيد حجاب )
http://up.omaniaa.co/do.php?img=12539
تمر اليوم ذكرى مولد الشاعر الكبير سيد حجاب الذى ولد فى سنة 1940 ورحل فى بداية العام الجارى 2017 لكنه يبقى بأشعاره وكلماته، فبجانب ديوانه المميز "قبل الطوفان الجاى"، كتب أيضا أيضاً كلمات لأغنيات أشهر المسلسلات المصرية، والتى لا يزال الناس يرددونها رغم مرور سنوات كثيرة على عرض هذه الأعمال الفنية.
فكلمات سيد حجاب محفورة فى وجدان المصريين، حتى أصبحت لسان حال الجمهور فى العديد من مواقفهم اليومية، فكتب " ليه يا زمان مسبتناش أبرياء" فى ليالى الحلمية، وله تغنى "على الحجار" عن الحلوانى اللى بنى مصر فى "بوابة الحلوانى".
ومن أشهر الجمل التى ارتبط بها الجمهور:
"وينفلت من بين إيدينا الزمان"
كانت ضمن كلمات تتر المقدمة لمسلسل أرابيسك بطولة الفنان الكبير صلاح السعدنى، ومن تأليف أسامة أنور عكاشة، وعُرض للمرة الأولى عام 1994، وغنى كلمات تتر البداية والنهاية للمسلسل الفنان حسن فؤاد من ألحان الموسيقار عمار الشريعى، وفيها:
وينفلت من بين إيدينا الزمان
كأنه سحبة قوس فى أوتار كمان
وتنفرط الأيام.. عقود كهرمان
يتفرفط النور.. والحنان.. والأمان
وينفلت من بين إيدينا الزمان
الشر.. شرَّق وغرَّب.. داخل فى حوشنا
حوشوا.. لا ريح شاردة تقشقش عشوشنا
حوشوا.. شرارة تطيش.. تشقق عروشنا
وتغشنا المرايات.. تشوش وشوشنا
وتهيل تراب ع الهالة والهيلمان
وينفلت من بين إيدينا الزمان
الغش طرطش.. رش ع الوش بُوية
ما دريتش مين بلياتشو.. أو مين رزين
شاب الزمان.. وشقيقى مش شكل أبويا
شاهت وشوشنا.. تهنا بين شين وزين
ولسه ياما وياما حنشوف كمان
وينفلت من بين إيدينا الزمان
"قالوا زمان دنيانا دنيا غرورة"
ضمن كلمات تتر البداية لمسلسل المال والبنون، بطولة الفنان يوسف شعبان وعبد الله غيث، ومن تأليف محمد جلال عبد القوى، وعرض على جزئين من عام 1993 إلى عام 1995، وتغنى بكلمات تتر المقدمة والنهاية الفنان على الحجار، ألحان الموسيقار ياسر عبد الرحمن.
وتقول كلمات الأغنية:
قالوا زمان دنيانا دنيا غرورة *** وقلنا واللى تغره يخسر مصيره
قالوا الشيطان قادر وله ألف صورة *** قلنا ما يقدر ع اللى خيره لغيره
إيه معنى دنيتنا وغاية حياتنا *** إذا بعنا فطرتنا البريئة الرقيقة
إزاى نبص لروحنا جوا مراياتنا *** إذا احنا عشنا هربانين من الحقيقة
المال تجيبه الريح وتاخذه الهوايل *** أما البنون يوم الحساب بيفوتونا
مال إيه ده لو كان مال قارون كله زايل *** ولا غير عمايل الخير ياهو ينجدونا
قالوا زمان دنيانا دنيا غرورة *** وقلنا واللى تغره يخسر مصيره
قالوا الشيطان قادر وله ألف صورة *** قلنا ما يقدر ع اللى خيره لغيره
ومين نكون إن بعنا يومنا وماضينا *** وليه نعيش إذا كانش بكرة يراضينا
وازاى ننام من غير ما نحلم ببكرة *** وبكرة ده منين ييجى إلا بإيدينا
قالوا زمان دنيا دنية غرورة *** وقلنا واللى تغره يخسر مصيره
قالوا الشيطان قادر وله ألف صورة *** قلنا ما يقدر عللى خيره لغيره
"ليه يا زمان مسبتناش أبرياء"
جاءت ضمن كلمات تتر مسلسل ليالى الحليمة، من بطولة الفنان يحيى الفخرانى والفنان صلاح السعدنى، وقدم فى 6 أجزاء، عرض الأول عام 1987، وتغنى بكلمات التتر الفنان محمد الحلو، ألحان الموسيقار ميشيل المصرى.
وتقول كلمات الأغنية:
ومنين بييجى الشجن … من إختلاف الزمن
ومنين بييجى الهوى … من إئتلاف الهوى
ومنين بييجى السواد … من الدموع والعناد
ومنين بييجى الرضا … من الإيمان بالقضا
من انكسار الروح فى دوح الوطن … ييجى إحتضار الشوق فى سجن البدن
من إختمار الحلم ييجى النهار … يعود غريب الدار لأهل و سكن
ليه يا زمان مسبتناش أبرياء … وواخدنا ليه فى طريق ممنوش رجوع
أقسى همومنا يفجر السخرية … وأصفى ضحكة تتوه فى بحر الدموع
ولفين ياخدنا الأنين … لليالى ملهاش عينين
ولفين ياخدنا الحنين … لواحة الحيرانين
متسرسبيش يا سنينا من بين إيدينا … و لا تنتهيش ده إحنا يادوب إبتدينا
واللى له أول بكرة ح يبانله آخر … وبكرة تفرج مهما ضاقت علينا
"كلنا بنجرى ورا نفس السراب"
قدمت ضمن تتر مسلسل الشهد والدموع، بطولة يوسف شعبان وعفاف شعيب، وتأليف أسامة أنور عكاشة، حيث عرض المسلسل عام 1984، وغنى تتر المسلسل الفنان على الحجار، من ألحان عمار الشريعى.
وتقول كلمات الأغنية:
تحت نفس الشمس
وفوق نفس التراب
كلنا بنجرى وراء نفس السراب
كلنا من أم واحدة أب واحد دم واحد
بس حاسين بإغتراب
بس حاسين بإغتراب
بين حنان الحب هل الغل جانا
من مرارة الغل جلجل صوت رجانا
نبكى من الغل اللي بيعكر حياتنا
و لا بالحب اللي هدهدنا و شجانا
يازمان الغربة ليلك بيحاصرنا
و في ضلامة المر طاوينا و عاصرنا
بس طول ماالحب بيرفرف علينا
الجدور حنمدها و نصنع مصيرنا
كلنا من أم واحده أب واحد دم واحد
بس حاسين بأغتراب
"اللى بنى مصر كان فى الأصل حلوانى"
قدمت ضمن تتر البداية لمسلسل بوابة الحلوانى، من بطولة عدد كبير من الفنانين منهم جميل راتب وعلى الحجار وخالد النبوى، ومن تأليف محفوظ عبد الرحمن، وغنى "الحجار" تترات المسلسل، من ألحان عمار الشريعى.
وتقول كلمات الأعنية:
بندق ندق بوابة الحياة بالإيدين قومى
قومى .. قومى افتحى لولادك الطيبين قومى .. قومى
اللى بنى بنى مصر كان فى الأصل حلوانى
وعشان كده مصر يا ولاد مصر ياولاد حلوة الحلوات
اللى بنى بنى مصر كان فى الأصل حلوانى
وعشان كده مصر يا ولاد مصر ياولاد حلوة الحلوات
اللى بنى بنى مصر كان فى الأصل حلوانى
وعشان كده مصر يا ولاد مصر ياولاد حلوة الحلوات
وادى وبوادى و بحور و قصور و موانى توحيد وفكر وصلاة
تراتيل غنا وابتهالات
وكل ده فى مصر يا ولاد مصر ياولاد حلوة الحلوات
اللى بنى بنى مصر كان فى الأصل حلوانى
و عشان كده مصر يا ولاد مصر ياولاد حلوة الحلوات
اللى بنى مصر كان حلوانى يا ولداه حلوانى .. حلوانى
